பி. எஸ். செட்டியார்: திருத்தங்களுக்கு இடையிலான வேறுபாடு
துவக்கம் |
(வேறுபாடு ஏதுமில்லை)
|
01:15, 25 அக்டோபர் 2020 இல் நிலவும் திருத்தம்
பி. எஸ். செட்டியார் என்று அழைக்கப்படும் பி. எஸ். பக்கிரிசாமி செட்டியார் (1905 – 1967) தமிழறிஞரும், தமிழாசிரியரும், இதழாசிரியரும், திரைப்படக் கதை, வசன எழுத்தாளரும், இயக்குநரும், அரசியல்வாதியும் ஆவார். சினிமா உலகம் என்ற முதலாவது தமிழ்த் திரைத்துறை மாதஇதழை நடத்தியவர்.[1]
| பி. எஸ். செட்டியார் | |
|---|---|
| படிமம்:PSChettiar.jpg 1930களில் பி. எஸ். செட்டியார் | |
| பிறப்பு | பி. எஸ். பக்கிரிசாமி செட்டியார் 1905 நன்னிலம், திருவாரூர் மாவட்டம், இந்தியா |
| இறப்பு | 1967 (அகவை 61–62) |
| தேசியம் | இந்தியர் |
| பணி | தமிழாசிரியர் |
| அறியப்படுவது | தமிழ்த் திரைத்துறை இதழியலின் முன்னோடி |
| பட்டம் | பண்டிதர் |
| பெற்றோர் | பாவாடைசாமி செட்டியார், கமலத்தம்மாள் |
வாழ்க்கைக் குறிப்பு
பி. எஸ். செட்டியார் திருவாரூர் மாவட்டம் நன்னிலத்தில் 1905 ஆம் ஆண்டில், பாவாடைசாமி செட்டியார் - கமலத்தம்மாள் ஆகியோருக்குப் பிறந்தார்.[1] தமிழ் இலக்கியத்தில் மிகுந்த ஆர்வம் கொண்ட இவர் பண்டிதர் (வித்துவான்) தேர்வில் தேர்ச்சிபெற்று[1] சென்னையில் உள்ள ஒரு உயர்நிலைப்பள்ளியில் தமிழாசிரியராகப் பணியாற்றினார்.[2] சிறுவர் விருந்து, செந்தமிழ்ச் செல்வி போன்ற பல நூல்களை எழுதினார். இவரது "அன்னை வாசகம்" என்ற பள்ளிகளில் துணைப்பாடமாகக் கற்பிக்கப்பட்டது.[1]
இதழாசிரியர்
தமிழரசு, தொழிலாளன், அமிர்த குணபோதினி ஆகியவற்றின் ஆசிரியராகப் பணியாற்றினார். "ஸ்வராஜ்யா" தமிழ் இதழில் பல எழுச்சிக் கட்டுரைகளை எழுதினார்.[1] சென்னையில் இருந்து 1930 இல் "சினிமா உலகம் - சினிமா ஒர்ல்ட்" என்ற மாத இதழை வெளியிட்டார். இப்பத்திரிகையே தமிழ்த் திரைத்துறைப் பத்திரிகைகளின் முன்னோடி ஆகும்.[1] வெகு காலம் சென்னையிலேயே வெளிவந்த இப்பத்திரிகை போர்க்கால நெருக்கடியால் கோயம்புத்தூருக்கு மாற்றப்பட்டது.[2] கோயம்புத்தூர் வரைட்டி ஹால் வீதியில் உள்ள அவரது இல்லத்திலேயே உள்ள ஒரு சிறிய அறையில் இருந்து இவ்வார இதழை வெளியிட்டார்.[2] வெகு காலம் வரை இவ்விதழின் விலை அரையணாவாகத் தான் இருந்தது. சாதாரணத் தாளில், ரோஸ் நிறக் காகித அட்டையுடன் அது வெளிவந்து கொண்டிருந்தது.[2] திரையுலகச் செய்திகள், தமிழ்-இந்தி ஆங்கிலப் படங்கள் பற்றிய தகவல்கள், விமர்சனங்கள், கேள்வி பதில்கள் போன்றவை இடம் பெற்றிருந்தன. இப் பத்திரிகையில் 1943 இல் வல்லிக்கண்ணன் ஒன்பது மாதங்களுக்கும் மேல் உதவி ஆசிரியராகப் பணியாற்றியிருந்தார்.[2] இப்பத்திரிகையில், திரைப்பட வசனகர்த்தாவாகப் புகழ்பெற்ற இளங்கோவன் (ம.க.தணிகாசலம்), கவி ச. து. சு. யோகியார், பாரதிதாசன்,[2] மற்றும் விபுலாநந்த அடிகள், திரு. வி. க. முதலியோரும் எழுதினர். கண்ணதாசனின் கவிதையும் இதில்தான் முதன் முதலாகப் பிரசுரமானது. இப்பத்திரிகை 1947 வரை வெளிவந்தது.[1]
திரையுலகில்
1936இல் வெளியான "இராஜா தேசிங்கு" என்ற திரைப்படத்திற்கு இவர் முதன் முதலில் கதை-வசனம் எழுதினார். சி.கண்ணன் பிள்ளை தயாரிப்பில் தண்டபாணி தேசிகர் முதன் முதலாக நடித்து வெளிவந்த "திருமழிசை ஆழ்வார்" (1948) திரைப்படத்துக்குக் கதை-வசனம் எழுதி, டி. எஸ். கோட்னீ உடன் இணை இயக்குநராகவும் பணியாற்றினார்.[1] காளமேகம் என்ற திரைப்படத்திலும் இவர் பணியாற்றினார்.[2]
அரசியலில்
இந்திய விடுதலைக்குப்பின் செட்டியார் இரு தடவைகள் சென்னை மாநகராட்சி உறுப்பினராக இருந்தார்.[1]
எழுதிய நூல்கள்
- சிறுவர் விருந்து
- செந்தமிழ்ச் செல்வி
- பெஞ்சமின் பிராங்க்ளின் வாழ்க்கை வரலாறு
- இந்தியப் பெரியார்
- அறிவுலக வீரர்
- அறிஞர் ஆர்.கே.எஸ்.
- தியாக உள்ளம் திருவருள்
- அயலவர் கண்ட இந்தியா
- காப்பியக் காட்சிகள்
- அன்னை வாசகம்
மேற்கோள்கள்
- ↑ 1.0 1.1 1.2 1.3 1.4 1.5 1.6 1.7 1.8 அ.மு.அபுல் அமீன் (2011). ""சினிமா உலகம்" - பி.எஸ் (பி.எஸ்.பக்கிரிசாமி செட்டியார்)". dinamani.com. தினமணி. Archived from the original on 21-11-2011. பார்க்கப்பட்ட நாள் 25-10-2020.
{{cite web}}: Check date values in:|access-date=and|archive-date=(help) - ↑ 2.0 2.1 2.2 2.3 2.4 2.5 2.6 வல்லிக்கண்ணன் (ஆகத்து 2001). வாழ்க்கைச் சுவடுகள். பூங்கொடி பதிப்பகம், மயிலாப்பூர். https://ta.wikisource.org/wiki/%E0%AE%AA%E0%AE%95%E0%AF%8D%E0%AE%95%E0%AE%AE%E0%AF%8D:%E0%AE%B5%E0%AE%BE%E0%AE%B4%E0%AF%8D%E0%AE%95%E0%AF%8D%E0%AE%95%E0%AF%88%E0%AE%9A%E0%AF%8D_%E0%AE%9A%E0%AF%81%E0%AE%B5%E0%AE%9F%E0%AF%81%E0%AE%95%E0%AE%B3%E0%AF%8D.pdf/80.