கருவூலம்

கருவூலம் (ஆங்கிலம்: Treasury) என்னும் சொல் அரசு-நிதியைப் பாதுகாத்து வழங்கும் இடம் ஆகும். இக்காலத்தில் இது அரசு நாணயங்களைப் பேணும் இடமாகத் திகழ்கிறது. இவை தலைமைக் கருவூலம், கிளைக்கருவூலம் என்னும் அமைப்புகளில் இயங்கிவருகின்றன.

சங்ககாலக் கருவூலங்கள்

தமிழ்நாட்டில் சங்ககாலத்தில் இருந்த கருவூலங்கள் பற்றிய செய்திகளைச் சங்கநூல்கள் குறிப்பிடுகின்றன.

• மாந்தை - சேர அரசர்களின் கருவூலம் மரந்தை அல்லது மாந்தை என்னும் துறைமுக நகரத்தில் இருந்தது. இமயவரம்பன் நெடுஞ்சேரலாதன் கடம்பர்களை வென்று கொண்டுவந்த செல்வத்தையும், இமயம் வரை வென்றதால் அடிபணிந்த மன்னர்கள் கொண்டுவந்து தந்த திறைச் செல்வத்தையும் இங்குப் பாதுகாத்தான்.
• குடந்தை - சோழர்களில் 'கொற்றச் சோழர்' எனப் போற்றப்பட்டவர்கள் குடந்தை நகரில் அரசுச் செல்வத்தைப் பாதுகாத்தனர்.
• காவிரிப்பூம்பட்டினம் - புகார்த் துறைமுகத்தில் அரசு விருந்தினர்களைப் பேணுவதற்காகச் அரசுச்செல்வம் வைக்கப்பட்டிருந்தது.
• மருங்கூர்ப் பட்டினம் என்னும் துறைமுகப் பட்டினத்தில் பாண்டியர் தம் கருவூலத்தை வைத்திருந்தனர்.
• மாவிலங்கை என்னும் தன் தலைநகரில் நல்லியக்கோடன் என்னும் வள்ளல்-அரசன் தன் கருவூலத்தை வைத்திருந்தான்.
• பாடலி என்னும் நகரில் நந்த அரசர்கள் கங்கை ஆற்று நீருக்கடியில் தம் கருவூலத்தை வைத்திருந்தனர்.
• செங்கண்மா – அரசன் செங்கண்மாத்து வேள் நன்னன் சேய் நன்னன் தன் கருவூலத்தை அவனது தலைநகரில் வைத்திருந்தான்.