வேதநாயகம் பிள்ளை

எழுத்தாளர், புலவர், நீதிபதி

மாயூரம் வேதநாயகம் பிள்ளை (Mayavaram Vedanayagam Pillai, (11 அக்டோபர் 1826 - 21 சூலை 1889) ஒரு தமிழ்நாட்டு எழுத்தாளர் ஆவார். இவர் எழுதிய பிரதாப முதலியார் சரித்திரம் (1879), புதினம் தமிழில் வெளியான முதல் புதினம் ஆகும்.

வேதநாயகம் பிள்ளை
வேதநாயகம் பிள்ளை
வேதநாயகம் பிள்ளை
பிறப்பு11 அக்டோபர் 1826
குளத்தூர், திருச்சினாப்பள்ளி மாவட்டம்,
சென்னை மாகாணம், பிரித்தானிய இந்தியா
(தற்போது திருச்சிராப்பள்ளி மாவட்டம், தமிழ்நாடு, இந்தியா)
இறப்பு21 சூலை 1889(1889-07-21) (அகவை 62)
தொழில்கவிஞர், எழுத்தாளர், தமிழறிஞர்
துணைவர்
  • பாப்பம்மாள் (தி. 1851)
குடும்பத்தினர்விஜய் ஆண்டனி (கொள்ளுப்பேரன்)

வாழ்க்கை தொகு

இவரின் தாயார் ஆரோக்கிய மரி-யும் தந்தை சவரிமுத்துப் பிள்ளையும்[1][2] திருச்சிராப்பள்ளியில் இருந்து மதுரைக்குத் தொடர்வண்டியில் செல்கையில் திருச்சிராப்பள்ளி மாவட்டத்தில் உள்ள குளத்தூர் தொடர்வண்டி நிலையத்தில் 11 அக்டோபர் 1826 அன்று வேதநாயகம் பிறந்தார்.[சான்று தேவை]

தொடக்கக் கல்வியைத் தமது தந்தையிடம் கற்ற வேதநாயகம் ஆங்கிலம், தமிழ் மொழிக்கல்வியை திருச்சிராப்பள்ளியைச் சேர்ந்த தியாகராச பிள்ளை என்பாரிடம் பயின்றார். சிறு வயதிலேயே திருமணங்கள், விருந்தினர் வருகை போன்ற நிகழ்வுகளின் போது நகைச்சுவையான கவிதைகளை எழுதினார்.[3]

மக்கள் பணி தொகு

இவர் நீதிமன்றங்களில் பதிவாளராகவும் மொழிபெயர்ப்பாளராகவும் பணியாற்றிய பின் 1856-இல் தரங்கம்பாடியில் முனிசீஃப் வேலையில் அமர்ந்தார். மாயவரம் மாவட்ட முனிசீப்பாக 13 ஆண்டுகள் பணி புரிந்தமையால் இவரை மாயவரம் வேதநாயகம் பிள்ளை என்றே அழைக்கலாயினர். மாயவரத்தின் நகர் மன்ற தலைவராகவும் பணியாற்றியுள்ளார்.

1876-78 சென்னை மாகாணப் பெரும் பஞ்சத்தின்போது தன் சொத்துகள் அனைத்தையும் கொடையளித்தார். இதனைப் போற்றும் விதமாகக் கோபாலகிருஷ்ண பாரதியார் நீயே புருஷ மேரு என்ற பாடலை எழுதினார்.[3]

இலக்கியப்பணி தொகு

அந்தக் காலகட்டத்தில் 16 புத்தகங்கள் எழுதினார். தமிழின் முதல் புதினமான பிரதாப முதலியார் சரித்திரத்தையும் அப்போதே எழுதினார். வீணை இசைப்பதிலும் வல்லமை பெற்றிருந்தார்.[3]

அவரது சமகாலத்தோரான தமிழறிஞர்கள்

  1. மீனாட்சி சுந்தரம் பிள்ளை,
  2. இராமலிங்க வள்ளலார்,
  3. திருவாவடுதுறை மடத்தின் மகாசன்னிதானம் சுப்பிரமணிய தேசிகர்,
  4. கோபாலகிருஷ்ண பாரதியார்

ஆகியோருடன் நட்பு பாராட்டி நெருங்கியிருந்தார்.

மொழிபெயர்ப்புப் பணி தொகு

கி.பி 1805 முதல் கி.பி. 1861-ஆம் ஆண்டு வரை ஆங்கில மொழியில் இருந்த சதர்ன் கோர்ட் தீர்ப்புகளை அதாவது 56 ஆண்டுகள் தீர்ப்புகளைத் தமிழில் மொழி பெயர்த்து சித்தாந்த சங்கிரகம் என்ற நூலாக 1862-இல் வெளிட்டார் மேலும் 1862, 1863-ஆம் ஆண்டுகளின் தீர்ப்புகளையும் அவ்வாறே வெளியிட்டார். இவ்வாறு தீர்ப்புகளை முமுதன்முதலில்மொழி பெயர்த்த தமிழறிஞர் வேதநாயகம் பிள்ளை ஆவார்.[1]

ஆக்கங்கள் தொகு

வேதநாயகம் பிள்ளை ஆக்கிய நூல்கள் பல. அவற்றுள் சில:

  • 1860 - நீதி நூல்
  • 1862-இல் சித்தாந்த சங்கிரகம் - உயர்நிலை ஆங்கில சட்டங்களைத் தமிழில் செய்த நூல்
  • 1869-இல் பெண்மதி மாலை - பெண்களுக்கு ஏற்ற அற முறைகளைப் பாட்டுகளாலும் உரைநடையாலும் கூறும் நூல்.
  • 1873-இல் மூன்று நூல்கள் திருவருள் அந்தாதி, திருவருள் மாலை, தேவமாதர் அந்தாதி இவை செய்யுள் நூல்கள். கிறித்துவ மதம் பற்றியது. மத வரலாறு, மற்றும் கடவுள் பால் அவருக்கிருந்த அன்பு இவற்றைப் புலப்படுத்துவது.
  • 1879-இல் பிரதாப முதலியார் சரித்திரம் புகழ் பெற்ற கற்பனைக்கதை, தமிழ் புதினங்களின் முன்னோடி. இது ஆங்கிலத்திலும் மொழிபெயர்க்கப்பட்டுள்ளது.
  • 1878-இல் சர்வ சமய சமரசக் கீர்த்தனை ஏறத்தாழ 200 இசைப்பாடலகள்.
  • 1887-இல் சுகுண சுந்தரி புதினம்
  • 1889-இல் சத்திய வேத கீர்த்தனை
  • பொம்மைக் கலியாணம், பெரியநாயகியம்மன் என்னும் நூல்களும் மற்றும் பல தனிப்பாடல்களும் இயற்றியுள்ளார்.

மறைவு தொகு

21 சூலை 1889 அன்று தன் 63-ஆம் அகவையில் காலமானார் வேதநாயகம்.

வழிமரபினர் தொகு

1851-இல் காரைக்காலைச் சேர்ந்த பாப்பம்மாள் என்பாரைத் திருமணம் செய்திருந்தார் வேதநாயகம்.

இவர் கொள்ளுப்பேரன் இசையமைப்பாளர் விஜய் ஆண்டனி ஆவார்.

உசாத்துணை தொகு

கலைக்களஞ்சியம், தமிழ் வளர்ச்சிக் கழகம், சென்னை, 1963.

மேற்கோள்கள் தொகு

  1. 1.0 1.1 தமிழ் நாவல் உலகின் தந்தை மாயூரம் வேதநாயகம் பிள்ளை, புலவர் என் வி கலைமணி ,சிவகாமி புக் பப்ளிக்கேஷன்ஸ்
  2. "மாயூரம் வேதநாயகம் பிள்ளை 10". Hindu Tamil Thisai. Retrieved 2021-12-10.
  3. 3.0 3.1 3.2 [1]

வெளி இணைப்புகள் தொகு

"https://ta.wikipedia.org/w/index.php?title=வேதநாயகம்_பிள்ளை&oldid=3684467" இலிருந்து மீள்விக்கப்பட்டது