ஆர் (மலர்)

சேர சோழ பாண்டியர் போரின் போது அடையாளம் தெரிவதற்காகச் சூடிக் கொள்ளும் பூ போந்தை, ஆர், வேம்பு.

ஆர் = ஆத்தி

இவற்றில் சோழர் அணிந்து கொள்ளும் பூ ‘ஆர்’.

இந்த ஆர் என்னும் பூ ‘ஆத்திப் பூ’ என்பதில் கருத்து மாறுபாடு இல்லை.

ஆத்திப் பூ என்பதை அடையாளம் காட்டுவதில் அறிஞர்கள் மாறுபடுகின்றனர்.

சிவபெருமான் சூடும் ஆத்தி

‘ஆத்தி சூடி’ என அறநூல் பாடிய பிற்கால ஔவையார் குறிப்பிடுகிறார்.

பூவரசம்பூ போன்ற அமைப்புடன், ஆனால், அதில் நான்கில் ஒரு பங்கு அளவினதாக வெள்ளை நிறத்திலும் மஞ்சள் நிறத்திலும் பூக்கும் மலரினை இக்காலத்தில் அறிஞர்கள் ஆத்தி எனக் காட்டுகின்றனர்.

சோழர் சூரிய குலத்தைச் சேர்ந்தவர்கள் என்பது பிற்காலத்தில் தோன்றிய கருத்தென்றுச் சிலர் சொல்வர். இந்தக் கருத்தில்கூடச் சோழன் சிவபெருமானின் குலம் என்று கொள்ளப்படவில்லை.

இவ்வாறு தமிழர்களின் சமயங்களில் ஒன்றான சைவ சமயத்தின் இறைவன் சிவபெருமான் ஆத்தி மலரை விரும்பிச் சூடுவதாக ஒரு கருத்தும் உள்ளது

சோழர் சூடும் ஆர் என்னும் ஆத்தி

தாமற்பல் கண்ணனார் என்னும் புலவர், சோழன் மாவளத்தானோடு சூதாடிய பொழுது தாமற்பல் கண்ணனார் சூதாட்டத்தில் வட்டை மறைத்துவைத்துத் தன்னை ஏமாற்றியதாக எண்ணிய சோழன் சினமுற்று, அவ்வட்டை அவர் மீது எறிந்தான். அதனால், கோபமுற்ற தாமற்பல் கண்ணனார், மாவளத்தானைப் பார்த்து மன்னா உன் செய்கையைப் பார்த்தால், நீ சோழ மன்னனுக்குப் பிறந்தவனாக எனக்குத் தோன்றவில்லையே, ஆத்திமாலை சூடிய உன் முன்னோரெல்லாம் பார்ப்பனர்கள் நோவுமாறு எந்தச் செயலையும் செய்யமாட்டர்களே என்று இகழ்கிறார்.

கோவூர் கிழார் என்னும் புலவர், தங்களுக்குள் இருந்த பகை காரணமாக சோழன் நலங்கிள்ளிக்கும் சோழன் நெடுங்கிள்ளிக்கும் இடையே போர் மூண்ட பொழுது, சோழனே உன்னுடைய மாலை ஆத்திப் பூக்களால் தொடுக்கப்பட்டது, உன்னோடு போர் புரிபவனின் மாலையும் ஆத்திப் பூவால் தொடுக்கப்பட்டதுதான். உங்கள் இருவரில் ஒருவர் தோற்றாலும் தோற்பது சோழனின் குடிதான் எனவே போரைத் தவிர்க்க என்று இருவருக்கும் அறிவுரை கூறுகிறார்.

சாத்தந்தையார் என்னும் புலவர் சோழ மன்னன் கோப்பெரு நற்கிள்ளி நாரால் நெருக்கமாகத் தொடுக்கப்பட்ட ஆத்தி மாலையையும் இரவலர்க்கு ஈகை செய்துவிடும் கவிந்த கையை உடைய வீரன் என்று குறிப்பிடுகிறார். மேலும் அவர், ஆத்தி மாலை சூடிய பெரியோன் கோப்பெரு நற்கிள்ளி ஊரைத் தன்வசமாக்கிக்கொள்ள வந்த மற்போர் வீரனுடன் போர் நடத்தினான் என்றும் குறிப்பிடுகிறார்.

சோழன் சூடும் ‘ஆத்தி’ எது – என்பதை நற்றிணைப் பாடல் ஒன்று நமக்குப் படம் பிடித்துக் காட்டுகிறது. ஆர் என்பது ஆத்தி-மலர். தமாலம் என்பது வெற்றிலைக் கொடி. அது படர்ந்த மரம் 'ஆர்'. வெற்றிலையைக் கொடிக்காலில் ஆத்தி மரத்தில் படரவிடுகின்றனர்.

தமாலம் கொடி வெற்றிலைக் கொடி எனச் கொள்வதற்குச் சிலப்பதிகார அடிகளும் துணை நிற்கின்றன.

இவற்றையும் பாருங்கள்

சங்ககால மலர்கள்