ஆறாம் வேற்றுமை

ஆறாம் வேற்றுமை என்பது பெயரின் எழுவாய்ப் பொருளைக் கிழமைப் பொருளாக (உரிமை)வேற்றுமைப் படுத்துவது ஆகும். கிழமைப் பொருள் தற்கிழமை , பிறிதின் கிழமை என இரு பொருளில் வரும் நூற்பா

" ஆறன் ஒருமைக்கு அதுவும் ஆதுவும்

பன்மைக்கு அவ்வும் உருபாம் பண்பு உறுப்பு

ஒன்றன் கூட்டம் பலவின் ஈட்டம்

திரிபின் ஆக்க மாம்தற் கிழமையும்

பிறிதின் கிழமையும் பேணுதல் பொருளே "

ஆறாம் வேற்றுமை உருபுகள்

அது , ஆது, அ என்பன ஆறாம் வேற்றுமைக்குரிய உருபுகளாகும். இவற்றுள் 'அது', 'ஆது' உருபுகள் ஒருமைக்கும் 'அ' உருபு பன்மைக்கும் வரும். 'அது' உருபு ஒருமைக்கு உரியதாயினும் சிறுபான்மை பன்மைக்கும் வரும்

சான்று

• எனது புத்தகம்,உனது வண்டி.
• எனாது கை, நினாது வரவு, தனாது பொருள்
• என கைகள், நின வீடுகள், தன பொருள்கள்

தற்கிழமைப் பொருள்கள்

தற்கிழமை ஐந்து வகைகளில் வரும் அவை,

1. குணமும் தொழிலுமாகிய பண்பு
2. உறுப்பு
3. ஒன்றன் கூட்டம்
4. பலவின் ஈட்டம்
5. திரிபின் ஆக்கம்

சான்று:

• காக்கையது கருமை- குணம்(பண்புத்தற்கிழமை)
• மன்னனது வரவு - தொழில்( பண்புத்தற்கிழமை)
• எனது கை,மரத்தினது கிளை- உறுப்புத் தற்கிழமை
• மாந்தரது கூட்டம், நெல்லது குப்பை - ஒன்றன் கூட்டத் தற்கிழமை( ஒரே வகைக் கூட்டம்)
• பறவையது கூட்டம்,விலங்கினது கூட்டம் - பலவினீட்டத் தற்கிழமை( விலங்குகள்,பறவைகளில் பல வகை)
• நெல்லினது பொரி,மஞ்சளது பொடி- திரிபினாக்கத்தற்கிழமை( அதே பொருள் வேறாக மாறுதல்)

பிறிதின் கிழமைப் பொருள்

பிறிதின் கிழமைப் பொருள் மூன்று வகையில் வரும்

• பொருள்
• இடம்
• காலம்

ஆகியவை ஆகும்

சான்று:

1. வேலனது பசு- பொருள் பிறிதின் கிழமை
2. கண்ணனது வீடு - இடப் பிறிதின் கிழமை
3. வள்ளியது நாள்- காலப் பிறிதின் கிழமை

சொல்லுருபு

ஆறாம் வேற்றுமைக்குரிய சொல்லுருபு உடைய என்பதாகும். இச் சொல்லுருபு ஒருமை, பன்மை ஆகிய இரண்டிற்கும் வரும்.

சான்று.

• என்னுடைய வீடு
• அவர்களுடைய வீடு
• உண்ணுடைய வீடு

உசாத்துணை

நன்னூல் சொல்லதிகாரம். வேற்றுமையியல்.