தடிவீரையன்

'தடிவீரையன் கோவில்' என்பது திருநெல்வேலியிலிருந்து சேரன்மகாதேவி செல்லும் வழியில் உள்ள குல தெய்வக் கோவில்களுள் ஒன்றாகும். இது ஒரு நாட்டார் தெய்வமாகும்.

வரலாறு

பாண்டிய மன்னன், நெல்லையப்பர் கோவில் கட்டுவதற்காக மரம் வேண்டும் என்று மேற்குத் தொடர்ச்சி மலைக்கு ஆட்களோடு செல்கிறான். இங்கிருந்த உயரமான மரங்களையெல்லாம் வெட்டிக் கொண்டுவந்து நெல்லையப்பர் கோயிலைக் கட்டுகிறான். கொடிமரமும் நாட்டுகிறான். இதனைத் தொடர்ந்து இவ்வூர் மக்களுக்கும் ஆடு மாடுகளுக்கும் நோய் பிடித்தல், இறத்தல் போன்ற துன்பங்கள் நேரிடுகின்றன. இதை அறிந்த மன்னன் கோடாங்கியை அழைத்து இதற்கான காரணத்தைக் கேட்கிறான்.

கோடாங்கியின் குறி

கோடாங்கியின் குறியில் மேற்குத் தொடர்ச்சி மலையிலிருந்து வெட்டிக்கொண்டு வந்த மரங்களோடு ஐயனாரும் வந்திருப்பது தெரிய வருகிறது. உடனே மன்னர் அதற்கானப் பரிகாரமக என்ன செய்ய வேண்டும் என்று கேட்க, தனக்கும் தன் பரிவாரங்களுக்கும் (தேவதைகள்) நெல்லையப்பர் கோயிலில் நிலையம் வேண்டும் எனக் கேட்கிறார் ஐயனார்.

மன்னர் கூற்று

இதைக் கேட்ட மன்னர் துணிந்து, பலி கேட்கும் தெய்வங்களுக்குக் கோயிலில் இடமில்லை என்றும் கோயிலுக்கு மேற்கே நிலையமிட்டுக் கொடுக்கிறேன் என்றும் வாக்குக் கொடுக்கிறான். இதன் பிறகு மக்களுக்கும் ஆடு மாடுகளுக்கும் நேர்ந்த துன்பங்கள் நீங்கிப் போகின்றன.

பெயர்க்காரணம்

மேற்குத் தொடர்ச்சி மலையிலிருந்து வெட்டிக்கொண்டு வரப்பட்டத் தடியில் இந்த ஐயனார் வந்தமையால் தடிவீரையன் எனப் பெயர் பெற்றார். இந்தத் தெருவிற்கும் தடிவீரையன் தெரு என்றே இன்றும் பெயர் வழங்கப்படுகிறது.

வழிபாடு

இந்தத் தடிவீரையன் சாமியை அருப்புக்கோட்டையில் உள்ள பட்டசாலியர் இனத்தைச் சார்ந்தவர்கள் குலதெய்வமாக வழிபடுகின்றனர்.

திருவிழா

பங்குனி உத்திரத்தில் இக்கோயிலுக்குக் கொடைத் திருவிழா நடத்தப்படுகிறது. இந்த விழாவில் வேறு பல சமூகத்தவரும் கலந்துகொள்கிறனர்.