வஞ்சி தமிழ்வளர் மன்றம்

பாண்டியன் நெடுஞ்செழியன் அவையில் மாங்குடி மருதன் தலைமையில் புலவர்கள் கூடித் தமிழ் பாடியது போலவே காவிரிப்பூம்பட்டினத்திலும், வஞ்சிமாநகரிலும் தமிழ் வளர்க்கும் மன்றங்கள் இருந்தன.

பதிற்றுப்பத்து

"கொண்டி மிகைப்படத் தண்டமிழ் செறித்து" (63-9)

பதிற்றுப்பத்து ஆறாம் பத்துத் தலைவன் செல்வக்கடுங்கோ வாழியாதன். இவனைச் சிறப்பித்துக் கபிலர் 10 பாடல்கள் பாடியுள்ளார். இவன் சிறிய இலைகளையுடைய உழிஞைப் பூ சூடிப் போருக்குச் சென்றானாம். அப்போது அவன் பகைநாடுகளிலிருந்து கொண்டிப்பொருள்களைக் கொண்டுவந்தானாம். அவற்றைத் தண்டமிழ் செறிவதற்குப் பயன்படுத்தினானாம்.

விளக்கம்

• தண்டமிழ்ச் செறித்து - என்று ஒற்று மிக்கு இருந்தால் கொண்டியைத் தமிழ்நாட்டில் செறித்து வைத்தான் என்று பொருள் கொள்ளவேண்டும்.
• தண்டமிழ் செறித்து என்று ஒற்று மிகாமல் இருந்தால் தண்டமிழைச் செறித்து எனப் பொருள் கொள்ளவேண்டும்.
• பாடலில் தண்டமிழ் செறித்து என ஒற்று மிகாமல் உள்ளது.
• தமிழைச் செறித்தல் என்பது தமிழைத் திண்மையுறச் செய்தல்.