ஆரிய சேகரன்
ஆரியசேகரன் என்பவன் ஆரியச்சக்கரவர்த்தி ஆரியசேகரன் என விரித்துரைக்கப்படுகிறான்.
இவன் முதலாம் மாறவர்மன் குலசேகர பாண்டியன் (1268-1311) படைத்தலைவர்களில் ஒருவன். இவன் பாண்டிய நாட்டுச் செவ்விருக்கை நல்லூர் பகுதியிலுள்ள சக்கரவர்த்தி நல்லூர் என்னும் ஊரில் பிறந்தவன்.[1] ‘மதிதுங்கன்’ என்பது இவனது இயற்பெயர். ‘தனி நின்று வென்ற பெருமான்’ என்னும் பட்டம் வழங்கி மாறவர்மன் இவனைப் பாராட்டியிருக்கிறான்.
இவன் சிங்கள அரசனைப் போரில் வென்று அவனது ‘அவகிரி’க் கோட்டையைக் கைப்பற்றினான்.[2] புகழேந்திப் புலவர் இலங்கை சென்று இந்த ஆரியசேகரனைப் பாடிப் பரிசில் பெற்றார்.[3] கொழும்பு பொருட்காட்சிச்சாலையில் உள்ள ஓர் ஆவணப்பாடல் இந்த ஆரியசேகரனைக் குறிப்பிடுகிறது. அந்தப் பாடல்
- வெண்பா
கங்கணம் வேற் கண் இணையால் கட்டினார் காமர்வளைப்
பங்கயங்கை மேல்திலதம் பாரித்தார் – பொங்கொலிநீர்ச்
சிங்கைநகர் ஆரியனை சேரா அனுரேசர்
தங்கள் மடமாதர் தாம்.[4]
- பாடல் சொல்லும் செய்தி
அனுரேசர் எனப் போற்றி வணங்கப்படும் சிவபெருமான், கோயில் கொண்டுள்ள ஊர் [5] வாழ் மாதர் சிங்கைநகர் ஆரியனை (ஆரிய சேகரனை) தம் இணைவேற்கண் கங்கணத்தால் கட்டிப்போட்டனர். கண்டோர் விரும்பும் தம் வளைக்கைத் தாமரையாலும் கட்ட விரும்பித் தம் நெற்றியில் திலகம் வைத்துக்கொண்டனர்.
கருவிநூல் தொகு
- மு. அருணாசலம், தமிழ் இலக்கிய வரலாறு, பதின்மூன்றாம் நூற்றாண்டு, 2005
- மு. அருணாசலம், தமிழ் இலக்கிய வரலாறு, பதினைந்தாம் நூற்றாண்டு, 2005
அடிக்குறிப்பு தொகு
- ↑ இவனது பெயர் விரிவிலுள்ள ‘சக்கரவர்த்தி’ என்னும் சொல் இவனது பிறந்த ஊரைக் குறிக்கும். ‘ஆரிய’ என்னும் அடைமொழி ‘ஆர்’ என்னும் உரிச்சொல் அடிப்படையிலிருந்து பிறந்தது. இவ்வுரிச்சொல் அறிவும் வல்லமையும் நிறைந்திருத்தலைக் குறிக்கும்.
- ↑ ஆண்டு 1288, மகாவம்சம் குறிப்பிடுகிறது.
- ↑ தமிழ் நாவலர் சரிதை.
- ↑ இந்த ஆவணப்பாடலின் ஆண்டு 1290.
- ↑ அனுராதபுரம்