ஆலிஸ் ஐ. பிரையன்
ஆலிஸ் ஐ. பிரையன் (Alice I. Bryan) (செப்டம்பர் 11, 1902 - அக்டோபர் 20, 1992) ஒரு அமெரிக்க உளவியலாளர் ஆவார். இவர் உளவியல் மற்றும் நூலகத் துறைகளில் பணியாற்றினார். இவரது ஆய்வுகள் பெண்களின் வாழ்க்கையில் பாகுபாடுகளை ஆவணப்படுத்தியது. பிரையன் தேசிய மகளிர் உளவியலாளர் அமைப்பின் நிறுவனராக இருந்தார். மேலும், கொலம்பியா பல்கலைக்கழகத்தின் நூலகப் பள்ளியில் முதல் பெண் முழுப் பேராசிரியரும் ஆவார்.
| ஆலிஸ் ஐ. பிரையன் | |
|---|---|
| பிறப்பு | செப்டம்பர் 11, 1902 கியர்னி, நியூ செர்சி, அமெரிக்கா |
| இறப்பு | அக்டோபர் 20, 1992 (அகவை 90) மன்ஹாட்டன், அமெரிக்கா |
| கல்வி | |
| பணி | உளவியலாளர், பேராசிரியர் |
ஆரம்ப வாழ்க்கை மற்றும் கல்வி தொகு
ஆலிஸ் இசபெல் பெவர் எனும் பெயரில் செப்டம்பர் 11, 1902 இல் நியூ செர்சியின் கியர்னியில் பிறந்தார். ஆரம்பக் கல்வியை வீட்டிலேயே கற்று, உயர்நிலைப் பள்ளியில் நுழைந்தார். [1] முதலாம் உலகப் போரின் போது ஆசிரியர் பற்றாக்குறை காரணமாக உயர்நிலைப் பள்ளியில் மாற்று ஆசிரியராக பணியாற்றத் தொடங்கினார். [1]
பிரையன் கொலம்பியா பல்கலைக்கழகத்தில் உளவியலில் மூன்று பட்டங்களைப் பெற்றார். 1929 இல் இளங்கலைப் பட்டம், 1930 இல் முதுகலைப் பட்டம் மற்றும் 1934 இல் முனைவர் பட்டமும் பெற்றுள்ளார். [2] இவரது முனைவர் பட்ட ஆய்வு ஐந்து வயது குழந்தைகளின் நினைவாற்றலுக்கும் நுண்ணறிவுக்கும் இடையே உள்ள தொடர்பை அடிப்படையாகக் கொண்டது. [1]
ஆராய்ச்சி மற்றும் உதவித்தொகை தொகு
தனது முனைவர் ஆராய்ச்சிக்குப் பிறகு, பிரையன் சாரா லாரன்ஸ் கல்லூரி மற்றும் பிராட் நிறுவனம் உட்பட பல பகுதி நேர கல்லூரிகளில் ஆசிரியர் பதவிகளில் பணியாற்றினார். [2] 1939 இல் கொலம்பியா பல்கலைக்கழக நூலக சேவைப் பள்ளியில் உதவிப் பேராசிரியராகச் சேர்ந்தார். [2] பிரையன் ஆய்வு முறைகள் மற்றும் நேர்காணல் நுட்பங்கள் உள்ளிட்ட தலைப்புகளுடன் நூலகம் மற்றும் உளவியல் சந்திப்பில் கட்டுரைகளை வெளியிட்டார்.
பிரையன் புத்தக வாசிப்புத் துறையில் ஒரு நிபுணராகக் கருதப்பட்டார். 1930 களில் இத்துறையில் சிறப்புகளை வரையறுக்க உதவினார். [2] நூல வாசிப்பு சிகிச்சையை நோயுற்றவர்களுக்கு சிகிச்சையாக மட்டுமே விவரிக்கும் மற்ற வல்லுநர்களுக்கு மாறாக, பிரையன் இது "உணர்ச்சி முதிர்ச்சியை வளர்ப்பதற்கும் மன ஆரோக்கியத்தை வளர்ப்பதற்கும் நிலைநிறுத்துவதற்கும்" ஒரு தடுப்பு நடவடிக்கையாக செயல்படும் என்று பரிந்துரைத்தார்.
இரண்டாம் உலகப் போரின் தொடக்கத்தில், போர் முயற்சியில் உளவியலாளர்களை அணிதிரட்டுவதை மேற்பார்வையிட உருவாக்கப்பட்ட உளவியல் அவசரக் குழுவில் ஆண் உளவியலாளர்கள் மட்டுமே பிரதிநிதித்துவப்படுத்தப்பட்டதாக பெண் உளவியலாளர்கள் கவலைப்பட்டனர். பிரையன் 1940 இல் தேசிய மகளிர் உளவியலாளர் மன்றத்தை நிறுவினார். தனது சொந்த குடியிருப்பில் தொடக்கக் கூட்டத்திற்கு தலைமை தாங்கினார். இந்த அமைப்பு பின்னர் பெண் உளவியலாளர்களின் சர்வதேச அமைப்பானது. [3]பிரையன் தனது வாழ்க்கை முழுவதும், பல நிறுவனங்களில் தலைமைப் பாத்திரங்களில் முன்வந்து, அமெரிக்க உளவியல் சங்கத்தின் சட்டங்களைத் திருத்துவதற்குப் பணியாற்றினார் . அமெரிக்க உளவியல் பயன்முறைச் சங்கத்தின் நிர்வாகச் செயலாளராக பணியாற்றினார். [2]
1951 இல் சிகாகோ பல்கலைக் கழகத்தில் நூலக அறிவியலில் முதுகலைப் பட்டம் பெற்றார். [2] சமூக அறிவியல் ஆராய்ச்சி கழகத்தின் நிதியுதவியுடன், பொது நூலக விசாரணைக்காக நூலகப் பணியாளர்களின் ஆய்வை நடத்துவதற்காக இவர் நியமிக்கப்பட்டார். [4] [2] இதன் விளைவாக 1952 இல் வெளியிடப்பட்ட தி பப்ளிக் லைப்ரரியன் என்ற புத்தகம், அமெரிக்கா முழுவதும் உள்ள 60 நூலகங்களில் உள்ள 3,000க்கும் மேற்பட்ட நூலகர்களுடன் நேர்காணல்களை அடிப்படையாகக் கொண்டது. [2] போதிய மற்றும் சமச்சீரற்ற சம்பளம், அத்துடன் பெரும்பாலான நூலகர்கள் பெண்களாக இருப்பதாகவும், ஆனால் இயக்குனர் மட்டத்தில் பெண்களின் பிரதிநிதித்துவம் குறைவாக இருந்தது என ஆய்வின் கண்டுபிடிப்புகள் இருந்தன. [1]
1956 இல் கொலம்பியாவின் நூலக சேவைக்கான பள்ளியில் முழுப் பேராசிரியரான முதல் பெண் ஆவார். [1] இவர் தனது ஆராய்ச்சியைத் தொடர்ந்தார். அத்துடன் ஆராய்ச்சி முறையைக் கற்பித்தார்; கூடுதலாக, இவர் பள்ளியின் முனைவர் பட்டப்படிப்பை உருவாக்க உதவினார். மேலும், முனைவர் பட்டக் குழுவின் தலைவராகவும் இருந்தார். [4] பிரையன் 1971 இல் ஓய்வு பெற்றார். [2]
இறப்பு தொகு
இவர் அக்டோபர் 20, 1992 அன்று நியூயார்க்கின் மன்ஹாட்டனில் இறந்தார்.[5]
மேற்கோள்கள் தொகு
- ↑ 1.0 1.1 1.2 1.3 1.4 Held, Lisa. "Alice I Bryan". Psychology's Feminist Voices. பார்க்கப்பட்ட நாள் 29 March 2020.
- ↑ 2.0 2.1 2.2 2.3 2.4 2.5 2.6 2.7 2.8 "Alice I. Bryan papers, 1921-1992 bulk 1935-1975". Columbia University Libraries Archival Collections. பார்க்கப்பட்ட நாள் 24 March 2020.
- ↑ "Alice I. Bryan, 90, Expert on Libraries". The New York Times: p. 24. 4 November 1992. https://www.nytimes.com/1992/11/04/obituaries/alice-i-bryan-90-expert-on-libraries.html. பார்த்த நாள்: 24 March 2020.
- ↑ 4.0 4.1 Maack, Mary Niles (Winter 1994). "Alice I. Bryan: Psychologist, Library Educator, and Feminist. 11 September 1902 – 30 October 1992". Libraries & Culture 29 (1): 128–132.Maack, Mary Niles (Winter 1994). "Alice I. Bryan: Psychologist, Library Educator, and Feminist. 11 September 1902 – 30 October 1992". Libraries & Culture. 29 (1): 128–132. JSTOR 25542624.
- ↑ Davis, Ronald G. Jr., தொகுப்பாசிரியர் (2003). Dictionary of American library biography. Second supplement. Westport, Connecticut: Libraries Unlimited. பக். 43–47. பன்னாட்டுத் தரப்புத்தக எண்:9781563088681. https://archive.org/details/dictionaryofamer0000unse_i6l0.