வீட்டு வடிவங்களும் பண்பாடும்

வீட்டு வடிவங்களும் பண்பாடும் என்னும் இக்கட்டுரை, பல்வேறு சமூகங்களையும் சேர்ந்த மக்களுடைய வீடுகளின் வடிவங்களைத் தீர்மானிப்பதில் அச்சமூகங்களின் பண்பாடு கொண்டுள்ள தாக்கங்களைப் பற்றிக் கூறுகிறது. மக்களுடைய வீடுகளின் வடிவங்களைத் தீர்மானிக்கும் காரணிகள் எவை என்பது குறித்துப் பல கோட்பாடுகள் பலரால், பல்வேறு காலகட்டங்களில் முன்வைக்கப்பட்டுள்ளன. இவற்றின்படி, வீட்டு வடிவங்களைத் தீர்மானிக்கும் காரணிகளாகக் கூறப்படுவனவற்றுள் காலநிலை, கட்டிடப்பொருட்கள், தொழில்நுட்பம், அமைவிடம், பாதுகாப்பு, பொருளாதாரம், சமயம், பண்பாடு என்பவை முக்கியமானவை ஆகும்.

1960களில் வீட்டு வடிவங்களைத் தீர்மானிப்பதில் பண்பாட்டின் முதன்மை நிலையை வலியுறுத்திப் பல கருத்துக்கள் முன்வைக்கப்பட்டன. இவற்றுள் அமெரிக்கப் பேராசிரியரான அமொஸ் ராப்பப்போர்ட் என்பவர், தான் எழுதிய "House, Form and Culture" நூலில் முன்வைத்த கருத்துக்கள் இந்தக் கருத்துருவின் வளர்ச்சிக்கு முன்னோடியாக விளங்கின. ஒரு சமூகத்தின் பண்பாடே அச்சமூகத்தில் புழக்கத்தில் இருக்கும் வீடுகளின் வடிவங்களைத் தீர்மானிப்பதில் முதன்மைக் காரணியாக விளங்குகின்றது என்றும், ஏனையவை துணைக் காரணிகளே என்று அவர் வாதித்தார். இவரைத் தொடர்ந்து மேலும் பலர் பொது மக்களின் வீடுகளைப் பண்பாட்டு நோக்கில் பார்த்து ஆய்வுகளை முன்னெடுக்கலாயினர்.

இங்கு குறிப்பிடப் படும் 'வீடுகள்' என்பது, தொழில்முறைக் கட்டிடக் கலைஞர்களால் வடிவமைக்கப்பட்டவீடுகளையும் ஒரு குறித்த பண்பாட்டுக்கு வெளியே உருவான வீடுகளையும் அவற்றைத் தழுவிக் கட்டப்பட்ட வீடுகளையும் தவிர்த்து, நாட்டார் கட்டிடக்கலை சார்ந்த வீடுகளையும் ஒரு பண்பாட்டினரின் பாரம்பரிய வீடுகளையும் முன்னிலைப் படுத்திக் குறிக்கின்றன.

பண்பாடு - வீடு ஆகியவற்றின் இடைவினை

பண்பாடு என்பது ஒரு பண்பியக் (abstract) கருத்துரு. இதன் வெளிப்பாடாக அமையக் கூடிய சமூக அமைப்புக்கள் மூலமோ அல்லது இதனூடாக வெளிப்படக்கூடிய மனிதச் செயற்பாடுகள் மூலமோதான் பண்பாடு என்பதை அறிந்துகொள்ள முடியும். இத்தகைய வெளிப்பாடுகளுக்கு ஆதரமாக அமையும் வகையில் தம்மைச் சுற்றியுள்ள சூழலை உருவாக்குவதற்கு மனிதர்கள் தொடர்ந்து முயற்சித்து வருகின்றனர். வீடுகள் இவ்வாறான சூழல்களுள் முக்கியமானவை.

உசாத்துணைகள்

• Rappoport, Amos., House Form and Culture, Prentice-Hall, New Jercy, 1969