அணுக்கட்டு எண்

அணுக்கட்டு எண் (Atomicity) என்பது ஒரு மூலக்கூறில் இருக்கும் மொத்த அணுக்களின் எண்ணிக்கையைக் குறிக்கிறது. எடுத்துக்காட்டாக, ஆக்சிசனின் ஒவ்வொரு மூலக்கூறும் (O2) இரண்டு ஆக்சிசன் அணுக்களால் ஆனது. எனவே ஆக்சிசனின் அணுக்கட்டு எண் 2 ஆகும். முற்காலத்தில் அணுக்கட்டு எண் என்ற சொல் சில நேரங்களில் இணைதிறனைக் குறிக்கும் அதே பொருளில் பயன்படுத்தப்பட்டுள்ளது.

அணுக்கட்டு எண்ணின் அடிப்படையில் மூலக்கூறூகள் பின்வருமாறு வகைப்படுத்தப்படுகின்றன.

ஓரணு மூலக்கூறுகள்

ஓரணுவால் ஆக்கப்பட்ட மூலக்கூறுகள் ஓரணு மூலக்கூறுகள் எனப்படும்.

எ.கா: ஈலியம், நியான், ஆர்கான் போன்ற அனைத்து மந்த வாயுக்கள்.

ஈரணு மூலக்கூறுகள்

இரண்டு அணுக்கள் சேர்ந்து உருவாகும் மூலக்கூறுகள் ஈரணு மூலக்கூறுகள் எனப்படும்.

எ.கா: ஐதரசன், குளோரின், ஆக்சிசன்.

மூவணு மூலக்கூறு

மூன்று அணுக்கள் சேர்ந்து உருவாகும் மூலக்கூறுகள் மூவணு மூலக்கூறுகள் எனப்படும்.

எ.கா: ஓசோன்.

பல்லணு மூலக்கூறுகள்

மூன்று அணுக்களுக்கு மேற்பட்ட அணுக்களால் ஆன மூலக்கூறு பல்லணு மூலக்கூறு எனப்படும்.

எ.கா:பாசுபரசு, கந்தகம்

அனைத்து உலோகங்களும், கார்பன் போன்ற வேறு சில தனிமங்களும் எளிமையான அமைப்பைக் கொண்டிருக்கவில்லை, ஆனால் அவை மிகப் பெரிய மற்றும் வரம்பற்ற எண்ணிக்கையிலான அணுக்களைக் கொண்டுள்ளன. அவற்றின் அணுக்கட்டு எண்ணை தீர்மானிக்க முடியாது. எனவே பொதுவாக இவற்றின் அணுக்கட்டு எண் 1 ஆக கருதப்படுகிறது.

ஒரே தனிமத்தின் புறவேற்றுமை வடிவங்கள் வெவ்வேறு அணுக்கட்டு எண்ணையும் கொண்டிருக்கலாம். முதல் முப்பது தனிமங்களின் அணுக்கட்டு எண் அட்டவனையில் கொடுக்கப்பட்டுள்ளது.

!அணு எண்	தனிமம்	அணுக்கட்டு எண்
1	நீரியம்	2
2	ஈலியம்	1
3	இலித்தியம்	1
4	பெரிலியம்	1
5	போரான்	1*
6	கரிமம்	1
7	நைட்ரசன்	2
8	ஆக்சிசன்	2
9	புளோரின்	2
10	நியான்	1
11	சோடியம்	1
12	மக்னீசியம்	1
13	அலுமினியம்	1
14	சிலிக்கான்	1**
15	பாசுபரசு	4
16	கந்தகம்	8
17	குளோரின்	2
18	ஆர்கான்	1
19	பொட்டாசியம்	1
20	கல்சியம்	1
21	இசுக்காண்டியம்	1
22	தைட்டானியம்	1
23	வனேடியம்	1
24	குரோமியம்	1
25	மாங்கனீசு	1
26	இரும்பு	1
27	கோபால்ட்டு	1
28	நிக்கல்	1
29	செப்பு	1
30	துத்தநாகம்	1
* போரானுக்கு பல புறவேற்றுமைகள் உண்டு.
** சிலிக்கான் வலைப்பின்னல் அணிக்கோவையாக உருவாகிறது