இந்து மகாஜன சங்கம் (மலேசியா)

இந்து மகாஜன சங்கம் (Hindu Mahajana Sangam), மலேசியா நாட்டில் வாழும் இந்து சமயம் சார்ந்த தொழிலாளர்களின் இலாப நோக்கமற்ற தன்னார்வத் தொண்டு நிறுவனம் ஆகும். 1935-ஆம் ஆண்டில் நிறுவப்பட்ட இதன் தலைமையிடம், மலேசியாவின் பினாங்கு மாநிலத் தலைநகரான ஜார்ஜ் டவுனில் இயங்குகிறது. 1935-ஆம் ஆண்டிற்கு முன்னர் இதனை கூட்டக்கடை மடம் என்று அழைக்கப்பட்டது.

இந்து மகாஜன சங்கம்
அமைவிடம்
நாடு:	மலேசியா
மாநிலம்:	பினாங்கு
அமைவு:	ஜார்ஜ் டவுன்
கோயில் தகவல்கள்
வரலாறு
அமைத்தவர்:	கூட்டக்கடை மாடம்
இணையதளம்:	Hindu Mahajana Sangam

வரலாறு

1933-ஆம் ஆண்டில் நடைபெற்ற பினாங்கு மகாமாரியம்மன் கோயில் முதல் குடமுழுக்கை ஒட்டி, 1935-ஆம் ஆண்டில் இந்து மகாஜன சங்கம், ஜார்ஜ் டவுனில் நிறுவப்பட்டது. முதன்முதலில் இந்த அமைப்பு சமயக் கடமைகளை கடைபிடிக்க வேண்டி நிறுவப்பட்டது. மேலும் இந்த தொண்டு நிறுவனம் மலேசியா வாழ் இந்துக்களின் கல்வி, சமூக/பண்பாடு மேம்பாடு மற்றும் பினாங்கு ஸ்ரீ முத்து மாரியம்மன் கோயில் மற்றும் அருள்மிகு பாலதண்டாயுதபாணி கோயில் நிர்வாகத்தில்/வளர்ச்சியில் பங்கேற்பது மற்றும் தொழிலாளர்களின் ஒன்றியமாகச் செயல்படுகிறது. இச்சங்கத்தின் மண்டபம் அருள்மிகு பாலதண்டாயுதபாணி கோயில் மலையுச்சியில் உள்ளது.

தலைமையிடம்

இந்து மகாஜன சங்கத்தின் தலைமையிடக் கட்டிடம் பினாங்கில் உள்ள தேவாலயத் தெருவில் 1935 முதல் 1988-ஆம் ஆண்டு வரை செயல்பட்டது. தற்போது பினாங்கின் தலைநகரான ஜார்ஜ் டவுனில் உள்ள காந்திஜி ஆஸ்ரமத்தில் சொந்த கட்டிடத்தில் இயங்குகிறது.

கோயில்கள் & திருவிழாக்கள்

தைப்பூசம் விழாவை காந்திஜி மண்டபத்தில் விருந்து உபசாரத்துடன் கொண்டாடப்படுகிறது. அன்று பல பக்தர்கள் பால் காவடிகள் ஏந்தி, 18 கிலோ மீட்டர் தொலைவிற்கு ஊர்வலமாக வந்து பாலதண்டாயுதபாணிக்கு பால் அபிசேகம் செய்வர்.

1951-ஆம் ஆண்டில் இந்து மகாஜன சங்கத்தினர், அருள்மிகு பாலதண்டாயுதபாணி திருக்கோயில் அருகே பிள்ளையார் கோயிலை எழுப்பி குடமுழுக்கு செய்தனர். பின்னர் 1970-ஆம் ஆண்டில் இக்கோயிலை புதுப்பித்தது. மேலும் பிள்ளையார் கோயிலில் ஆண்டுதோறும் விநாயகர் சதுர்த்தி கொண்டாடுகிறது.

சித்திரைத் திருவிழாவின் போது ஐம்பொன் முருகன் விக்கிரகத்தை தேரில் அமர்த்தி, பகதர்கள் புடைசூழ, பாலதண்டாயுதபாணி கோயிலிருந்து, முத்து மாரியம்மன் கோயில் வரை ஊர்வலம் நடத்தப்படுகிறது.

இந்து மகாஜன சங்கம் சார்பில் முத்து மாரியம்மன் கோயிலில் நவராத்திரி விழா கொண்டாடப்படுகிறது.1900-ஆம் ஆண்டு முதல் மார்கழி மாதத்தில் வைகுண்ட ஏகாதசி விழாவை குஞ்ச் பிகாரி எனும் கிருஷ்ணன் கோயிலில் கொண்டாடப்படுகிறது.