சினேந்திரமாலை

சினேந்திர மாலை என்பது ஒரு சமண நூல். உபேந்திர ஆசாரியர் என்னும் சமண முனிவர் இதன் ஆசிரியர். சிலப்பதிகாரம் அருபதவுரை இந்த நூலின் பாடல் ஒன்றை மேற்கோளாகத் தருவதால் இந்த நூலின் காலம் 10 ஆம் நூற்றாண்டு எனக் கொள்கின்றனர்.

சினேந்திரன் – அருகன். எண்வகைக் கன்மங்களையும் சயித்தவன் – என்னும் விளக்கத்தைச் சிலப்பதிகாரம் அடியார்க்கு நல்லார் உரை குறிப்பிடுகிறது.

இந்த நூல் பாயிரப் பகுதியில் உள்ள 9 பாடல்களையும் சேர்த்து 464 வெண்பாக்களைக் கொண்டது. 23 காண்டங்களாகப் பகுக்கப்பட்டுள்ளது.

நூல் சொல்லும் செய்திகளில் சில

• கோள்களின் உதயம், நட்பு, பகை, திக்கு, பால், வடிவு முதலான செய்திகள் 80 பாடல்களில் சொல்லப்பட்டுள்ளன.
• ஆருடச் சக்கரம் 6 பாடல்களில் கூறப்பட்டுள்ளது.
• ”மூதுணர்ந்தோர் நூலின் முறை தெரிந்து யான் எடுத்துரைக்கிறேன்” எனக் கூறிக்கொண்டு இவர் குறிப்பிடும் செய்திகளில் சில. தாது-மூலம், சீவன், புதைபொருள் காணும் வழி, நலந்தீங்கு, பிணி, மரணம், உண்டி, கனா, குணம், மங்கலம், காமம், மகப்பேறு, சரிகை, சல்லியம், மழைவரவு முதலானவை.
• இந்த நூலின் ஆறு ஆருடப் பாடல்களுக்கு எழுதப்பட்டுள்ள உரையில் 104 சக்கரங்கள் காட்டப்பட்டுள்ளன.

கருவிநூல்

• மு. அருணாசலம், தமிழ் இலக்கிய வரலாறு, பத்தாம் நூற்றாண்டு, பதிப்பு 2005