இந்நூலின் காலம் [[கி.பி.]] இரண்டாம் நூற்றாண்டு எனக் கருதப்படுகின்றது.அனைவராலும் இது கடைச்சங்ககால நூல் என்பது ஏற்றுக்கொள்ளப்படுகிறது. கபிலர், பரணர் ஆகிய கடைச்சங்க புலவர்களால் இந்நூல் பாடப்பட்டுள்ளதால் இந்நூல் கடைச்சங்க கால நூல் என்று கூறுவதில் எந்த மாறுபாடும் இருக்கவாய்ப்பில்லை.
சேரமன்னர்கள் காலத்தால் சோழமன்னர்களைக் காட்டிலும் பாண்டியர்களை காட்டிலும் முந்தியவர்கள் என்று கருத கீழ்க்காணும் செய்திகள் வாய்ப்பளிக்கின்றன. சோழர்கள் சூரிய குலத்தவராகவும், பாண்டியர்கள் சந்திரகுலத்தவராகவும் கருதப்படும்போது, சேரர்களின் தொடக்கம் அக்னிக்கு எடுத்துச்செல்லப்படுகிறது. மூவேந்தர்களை குறிக்கும் சொற்றொடர் முதலில் சேரர்களையே இடும் வழக்கத்தைப் பெற்றிருக்கிறது. சேர, சோழ பாண்டியர் என்றே குறிப்பிடப்படுகிறது. மூவேந்தரை குறிக்கும் மற்றொருசொற்றொடரிலும் சேரரை முன்னே வைக்கும் பழக்கம் தொன்று தொட்டு இருந்து வருகிறது. சேரரை குறிக்கும் மற்றொரு சொல் குட்டுவன் என்பதாகும். சோழரை குறிக்க செம்பியன் என்ற சொல்லும் பாண்டியரைக் குறிக்க செழியன் என்ற சொல்லும் பயன்பாட்டில் இருந்துவருகின்றன. குட்டுவன், செம்பியன், செழியன் என்ற வரிசையே பயன்பாட்டில் இருந்து வருகின்றது. <ref>பத்துப்பாட்டு நூல்களுல் ஒன்றாகிய சிறுபாணாற்றுப்படை என்ற நூலில் அடி 49 ல் சேரனை குட்டுவன் என்றும், அடி 65 ல் பாண்டியனை செழியன் என்றும் அடி 82ல் சோழனை செம்பியன் என்றும் நூலாசிரியர் நல்லூர் நத்தத்தனார் குறிப்பிடுகிறார். </ref> சேரர்களைப்பற்றிய வரலாற்றையும், சங்க கால சமுதாய வரலாற்றையும் அளித்திடும் தனிச்சிறப்புப்பெற்றுள்ள இந்நூலின் பாட்டுடைத்தலைவர்களின் சிறப்பை அறிந்திட மேற்கண்ட செய்திகள் உதவிடும்.
