லியோனோரா பில்கெர்

அமெரிக்கப் பெண் வேதியியலாளர்

லியோனோரா பில்கெர் (Leonora Bilger) (3 பிப்ரவரி 1893 - 19 பிப்ரவரி 1975, நியூபர்) நைட்ரசன் சேர்மங்களை ஆய்வு செய்த ஒரு அமெரிக்கப் பெண் வேதியியலாளர் ஆவார். இவர் தனது பணியின் பெரும்பகுதியில் ஹவாய் பல்கலைக்கழகத்தில் ஒரு பிரபலமான ஆசிரியராகவும் நிர்வாகியாகவும் இருந்தார்.

லியோனோரா பில்கெர்
பிறப்பு (1893-02-03)பெப்ரவரி 3, 1893
பாஸ்டன், மாசச்சூசெட்ஸ்
இறப்புபெப்ரவரி 19, 1975(1975-02-19) (அகவை 82)
குடியுரிமைஅமெரிக்கர்
அறியப்பட்டதுகரிம நைட்ரசன் சேர்மங்கள் பற்றிய ஆய்வு

வாழ்க்கை தொகு

1893 ஆம் ஆண்டு பிப்ரவரி 3 ஆம் நாள் [1] பாஸ்டன், மாசசூசெட்ஸில் பிறந்தார். இவரது தந்தை ஜார்ஜ் நியூஃபர் மற்றும் அவரது தாயார் எலிசபெத் நியூஃபர். இவருக்கு 7 வயதாக இருந்தபோது, இவரது குடும்பம் ஓஹியோவின் சின்சினாட்டிக்கு குடிபெயர்ந்தது. அங்கு பில்கர் (அப்போது நியூஃபர்) தொடக்க மற்றும் மேல்நிலைப் பள்ளிகளில் பயின்றார். [2] 1929 ஆம் ஆண்டிற்கு முன், இவர் சின்சினாட்டி பல்கலைக்கழகத்தில் பேராசிரியரான ஏர்ல் எம். பில்கரை மணந்தார். இவர் தனக்கு 82 வயதான நிலையில் 19 பிப்ரவரி 1975 அன்று இறந்தார். [3]

கல்வி தொகு

பில்கெர் 1909 ஆம் ஆண்டில் தனது பதின்மக் கல்வியையும், 1913 ஆம் ஆண்டில் வேதியியலில் இளங்கலைப் பட்டத்தையும், அத்துடன் தன் முதுகலைப் பட்டத்தை 1914 ஆம் ஆண்டிலும் சின்சினாட்டி பல்கலைக் கழகத்தில் முடித்தார். [2] இதே பல்கலைக்கழகத்தில் 1916 ஆம் ஆண்டில், வேதியியலில் தனது முனைவர் பட்டத்தைப் பெற்றார். பின்னர் இதே பல்கலைக்கழகத்தில் இவர் பணிபுரியவும் தொடங்கினார். [1]

அறிவியல் பணி தொகு

தனது முனைவர் பட்டத்தைப் பெற்ற சிறிது நேரத்திலேயே, பில்கர் ஸ்வீட் பிரையர் கல்லூரியின் வேதியியல் துறையின் தலைவராக ஆனார், அந்தப் பதவியில் இவர் இரண்டு ஆண்டுகள் இருந்தார். 1919 ஆம் ஆண்டில், இவர் தான் பயின்ற வேதியியல் துறைக்குத் திரும்பினார். அங்கு இவர் 10 ஆண்டுகள் தங்கினார். பில்கர் 1924-25 வரை கேம்பிரிச்சுப் பல்கலைக்கழகத்தின் நியூன்ஹாம் கல்லூரியில்[4] சாரா பெர்லினர் ஆய்வு மாணவராகக் கழித்தார். சின்சினாட்டி பல்கலைக்கழகத்தில் பணிபுரிந்த பிறகு, பில்கரும் இவரது கணவரும் ஹவாய் பல்கலைக்கழகத்தின் வேதியியல் துறைக்குச் சென்றனர். அங்கு இவர் தனது தொழில் வாழ்க்கையின் எஞ்சிய பகுதியைக் கழித்தார். இவர் 1943 ஆம் ஆண்டில் துறைத் தலைவராகப் பதவி உயர்வு பெற்று 11 ஆண்டுகள் அந்தப் பதவியில் இருந்தார்; 1953 ஆம் ஆண்டில் இவர் அங்கு மூத்த பேராசிரியரானார். 1960 ஆம் ஆண்டில், இவர் ஓய்வு பெற்று விட்டார். ஓய்வு பெற்ற பேராசிரியராக 1964 ஆம் ஆண்டு வரை பணியாற்றி விட்டு பின்னர் முழுமையாக ஓய்வு பெற்றார். ஹவாய் பல்கலைக்கழகத்தில் அவர் இருந்த காலத்தில், அவர்களின் புதிய வேதியியல் ஆய்வகத்தை வடிவமைத்தார். இந்த ஆய்வகம் 1951 ஆம் ஆண்டில் கட்டி முடிக்கப்பட்டது. [3] 70,000 சதுர அடி வசதியைக் கொண்ட இந்த ஆய்வகத்தின் கட்டுமான செலவு 1.5 மில்லியன் டாலர் ஆகும். இந்த ஆய்வகத்திற்கு 1959 ஆம் ஆண்டில் பில்கர்ஸ் பெயரிடப்பட்டது. [5] [6] [7]

நைட்ரஜன் சேர்மங்கள் பற்றிய பில்கரின் ஆய்வுகள் ஹைட்ராக்சிலமின்கள் மற்றும் ஹைட்ராக்ஸாமிக் அமிலங்களைப் பற்றிய அவரது ஆய்வறிக்கையில் தொடங்கியது. இவர் சின்சினாட்டி பல்கலைக்கழகத்தின் வேதியியல் துறைக்குத் திரும்பியபோது, அதன் ஆராய்ச்சியை வழிநடத்தும் பணி அவருக்கு வழங்கப்பட்டது. இந்த நேரத்தில் சமச்சீரற்ற நைட்ரஜன் வேதிப்பொருள்களைப் பற்றி ஆய்வு மேற்கொண்டார். [3] பில்கர் ஹவாய் பல்கலைக்கழகத்தில் இந்த ஆராய்ச்சியைத் தொடர்ந்தார். இருப்பினும், இவர் கற்பித்தல் மற்றும் நிர்வாகப் பணிகளுக்கு அதிக நேரத்தை ஒதுக்கினார். [2] இவரது பிற்கால ஆராய்ச்சி புற்றுநோயை எதிர்த்துப் போராடும் வேதிப்பொருள்களின் நச்சுத்தன்மையைப் பற்றியது. வெப்பமண்டலத் தாவர எண்ணெய்களில் காணப்படும் ஸ்டீரால்கள் மற்றும் சிவப்பு மிளகாயில் உள்ள நிறமிகளையும் இவர் ஆய்வு செய்தார். [8]

கௌரவங்கள் தொகு

1953 ஆம் ஆண்டில், அமெரிக்க வேதியியல் குமுகம் வழங்கிய கார்வன்-ஒலின் பதக்கத்தைப் பெற்றவர் பில்கர். சமச்சீரற்ற நைட்ரஜன் சேர்மங்களுடன் அவர் செய்த பணிக்காக இந்த கௌரவத்தைப் பெற்றார். 1936 ஆம் ஆண்டு முதல் வழங்கப்பட்டு வரும் இந்தப் பதக்கம், வேதியியல் துறையில் குறிப்பிடத்தக்க பங்களிப்பைச் செய்த பெண்களுக்கு வழங்கப்படுகிறது. [3] அவர் அறிவியல் முன்னேற்றத்திற்கான அமெரிக்க சங்கம் மற்றும் நியூயார்க் அறிவியல் அகாதமி ஆகியவற்றில் உறுப்பினராக இருந்தார்.

மேற்கோள்கள் தொகு

  1. 1.0 1.1 Shrode 1997, ப. 18.
  2. 2.0 2.1 2.2 Oakes 2002, ப. 29.
  3. 3.0 3.1 3.2 3.3 Shrode 1997, ப. 19.
  4. University of Hawaii
  5. Shrode 1997, ப. 20.
  6. Oakes 2002, ப. 30.
  7. Google books Encyclopedia of World Scientists By Elizabeth H. Oakes (2007)
  8. Ogilvie & Harvey 2000, ப. 127.
"https://ta.wikipedia.org/w/index.php?title=லியோனோரா_பில்கெர்&oldid=3383551" இலிருந்து மீள்விக்கப்பட்டது