சாருகேசி (எழுத்தாளர்)

சாருகேசி என்ற புனைபெயரைக் கொண்ட எஸ். விஸ்வநாதன் (1938 - சனவரி 30, 2019) தமிழக எழுத்தாளரும், இசை விமர்சகரும் ஆவார். பிரபலமான வார, மாத இதழ்களில் தமிழிலும் ஆங்கிலத்திலும் சங்கீத, நாட்டிய, நாடக விமர்சனங்கள் எழுதி வந்தார்.

வாழ்க்கைக் குறிப்பு

சாருகேசியின் இயற்பெயர் சுப்பிரமணியன் விஸ்வநாதன். பாலக்காட்டில் பிறந்தார். எழுத்தாளர் எழுத்தாளர் தேவனின் உறவினர். இவரது முதல் கட்டுரை 1955 ‘கண்ணன்’ இதழில் வெளியானது. முதல் சிறுகதை 1960 இல் கல்கி இதழில் வெளியானது. அகமதாபாதில் தனியார் நிறுவனம் ஒன்றில் பணிபுரிந்தார். பின்னர் சென்னை திரும்பி இந்து, வீக்எண்ட் எக்ஸ்பிரஸ், எகனாமிக் டைம்சு போன்ற நாளிதழ்களில் ஆங்கிலக் கட்டுரைகளை எழுதினார். சுதா மூர்த்தியின் மூன்று ஆங்கில நூல்களைத் தமிழாக்கம் செய்துள்ளார்.

பின்னாட்களில் தனது கர்நாடக இசை அறிவைப் பெருக்கிக் கொண்டார். 1980-களில் சமூக ஆர்வலர்கள், இலக்கிய ஆர்வலர்கள், அரசியல்வாதிகள், கலைத்துறையினர் என பலர்காணல்களை கல்கியில் எழுதினார். உலக மாமியார்களே ஒன்று சேருங்கள் என்ற இவரது சிறுகதை கல்கியில் முதல்பரிசை வென்றது. 28 இளம் கலைஞர்களின் நேர்காணல்கள் 'இயல் இசை நாடகம்' என்ற பெயரிலேயே நூலாக வெளிவந்தது.

சமூகப் பணி

புத்தக நண்பர்கள் சங்கத்தில் இவரது பங்களிப்பு முக்கியமானது. தேவன் அறக்கட்டளையிலும் முக்கியப் பொறுப்புகளை ஏற்று செயல்பட்டு வந்தார்.

மறைவு

புற்றுநோயால் பாதிக்கப்பட்ட நிலையில் சாருகேசி சென்னையில் அபிராமபுரத்தில் உள்ள அவரது இல்லத்தில் 2019 சனவரி 30 இல் தனது 80-வது அகவையில் காலமானார். இவர் திருமணம் செய்யாதவர். இவருக்கு 4 சகோதரிகள், 2 சகோதரர்கள் உள்ளனர். மஞ்சரி இதழின் ஆசிரியராகப் பணியாற்றிய லெமன் என்கிற லெட்சுமணன் இவரது மூத்த சகோதரர்.