செண்பகவல்லி அணைக்கட்டு

செண்பகவல்லி அணைக்கட்டு (Shenbagavalli Dam) கேரள மாநில எல்லைக்குள் அமைந்துள்ள தடுப்பணையாகும். இது தென்காசி மாவட்டம் வாசுதேவநல்லூர் மேற்குத் தொடர்ச்சி மலையில் 26 கிலோ மீட்டர் தொலைவில் அடர்ந்த காட்டுப் பகுதியில் அமைந்துள்ளது. இதனால் தென்காசி, திருநெல்வேலி, தூத்துக்குடி, விருதுநகர் மாவட்டங்களில் சுமார் 36,000 ஏக்கர் பாசனவசதி பெற்றுவந்தது.

செண்பகவல்லி அணைக்கட்டு Shenbagavalli Dam
நாடு	இந்தியா
அமைவிடம்	கேரளா (முன்னர் தமிழகம்)
நோக்கம்	நீர்பாசனம்
நிலை	பாதிப்படைந்துள்ளது
கட்டத் தொடங்கியது	1873

சொக்கம்பட்டி குன்றின் அடிவாரத்தைச் சுற்றிக் கட்டப்பட்டுள்ள இந்த அணையைக் கட்ட வித்திட்டவர் சிவகிரி ஜமீன்தார் வரகுண சங்கர பாண்டியன். இவர் 1873ஆம் ஆண்டு திருவிதாங்கூர் மன்னர் தர்மராஜா மார்த்தாண்ட வர்மாவுடன் ஒப்பந்தம் போட்டு அணையைக் கட்டினார்.

அணையிலிருந்து வரும் தண்ணீர் வாசுதேவநல்லூர் தலையணையை அடைந்து அங்கிருந்து இராசிங்கபேரி குலசேகர ஆழ்வார் ஆகிய இரண்டு கால்வாய்கள் மூலம் வாசுதேவநல்லூர், சிவகிரி, சங்கரன்கோவில், திருவேங்கடம், கோவில்பட்டி வரை தண்ணீர் செல்லும். 1955ஆம் ஆண்டு ஏற்பட்ட பழுதை அப்போதைய தமிழக அரசு சரிசெய்தது. பின்னர் 1967-ல் இதன் சில பகுதிகள் மழை வெள்ளத்தால் அடிக்கப்பட்ட நிலையில் பின்னர் இருமாநில அரசுகளும் சரிசெய்யவில்லை. செண்பகவல்லி அணை மீட்புக்குழுவினர் பல்வேறு சட்டப்போராட்டங்களும், அறப்போராட்டங்களும் நடத்திவருகின்றனர். செண்பகவல்லி தடுப்பணையின் அணை உடைப்பைச் சரிசெய்ய நீதிமன்றம் உத்தரவிட்டது, ஆனால் இன்னும் உடைப்பு சரிசெய்யப்படாமல் உள்ளது.