தமிழகத்தின் நவ கைலாயங்கள்
தமிழகத்தின் நவ கைலாயங்கள் (Nava Kailasam) என்பவை தமிழ்நாட்டின் தாமிரபரணி நதிக்கரையில் அமைந்துள்ள ஒன்பது சிவாலயங்கள் உள்ள ஊரைக் குறிப்பதாகும். இவை திருநெல்வேலி மற்றும் தூத்துக்குடி மாவட்டங்களில் அமைந்துள்ளது.[1] இந்த தலங்களைத் தரிசித்தால் செய்த பாவங்களிலிருந்து விடுபட்டு முக்தி அடையலாம் என்று கூறப்படுகிறது. இந்தத் தலங்களை மகாசிவராத்திரியன்று பக்தர்கள் தரிசனம் செய்கின்றனர்.
இந்தத் தலங்களை தரிசனம் செய்ய மார்கழி மாதங்களில் தமிழக அரசே சிறப்பு பேருந்தினை ஏற்பாடு செய்கிறது. காலையில் திருநெல்வேலியில் இருந்து கிளம்பி நவகைலாயங்களை தரிசனம் செய்துவிட்டு இரவுக்குள் திருநெல்வேலிக்கு திரும்பும்படி ஏற்பாடு செய்யப்படுகிறது.[2]
வரலாறு
தொகுஅகத்திய முனிவரின் சீடர்களில் முக்கியமானவரான உரோமச முனிவர் தன் குருவான அகத்தியரின் உதவியுடன் சிவபெருமானை நேரில் தரிசித்து, அதன் மூலம் முக்தி அடைய வேண்டும் என்று விரும்பி தனது குருவிடம் அதற்கான வழிமுறைகளைக் கேட்டதாகவும். அதற்கு அகத்திய முனிவரும் தாமிரபரணி ஆற்றில் 9 தாமரை மலர்களை மிதக்க விட்டு அவை ஒவ்வொன்றாக கரை ஒதுங்கும் இடங்களில் சங்கு மூலம் நீராடி நவக்கிரகங்களின் வரிசையில் சிவபெருமானை வழிபட்டால் சிவபெருமானின் காட்சி கிடைக்கும் என்றும் அதன் மூலம் முக்தி அடையலாம் என்று சொல்லி 9 தாமரை மலர்களை தாமிரபரணி ஆற்றில் மிதக்க விட்டதாகவும் அந்த மலர்களை தொடர்ந்து சென்ற உரோமச முனிவரும் தனது குரு கூறியபடி வழிபட்டு முக்தி அடைந்தார் என்றும் அப்படி அம்மலர்கள் கரை ஒதுங்கிய இடங்கள் தான் இப்போது நவகைலாயங்கள் என்று அழைக்கப்படுவதாகவும் இத்தலங்களின் வரலாறு கூறுகின்றது.
நவகைலாயங்கள்
தொகுபாபநாசம், சேரன்மகாதேவி, கோடகநல்லூர், குன்னத்தூர், முறப்பநாடு, திருவைகுண்டம், தென்திருப்பேரை, ராஜபதி, சேர்ந்த பூமங்கலம் ஆகிய ஊர்களை நவகைலாயங்கள் என்று அழைக்கின்றனர். இவற்றில் முதல் மூன்று தலங்களை மேல்கைலாயங்கள் என்றும், அடுத்த மூன்று தலங்களை நடுகைலாயங்கள் என்றும், இறுதி மூன்றினை கீழ்க்கைலாயங்கள் என்றும் வகைப்படுத்துகின்றனர்.
இந்த நவகைலாயத் தளங்களில் நவக்கிரங்களின் வழிபாடுகளும் முக்கியத்துவம் பெற்றுள்ளன. இந்தத் தலங்களில் நவக்கிரங்கள் வழிபட்டுள்ளன என்று கூறப்படுகிறது.
| வ.எண் | ஊர் | கோயில் | வழிப்பட்ட கிரகம் | கைலாய வகை |
|---|---|---|---|---|
| 1 | பாபநாசம் | பாபநாசநாதர் கோயில் | சூரியன் | மேல்கைலாயம் |
| 2 | சேரன்மாதேவி | சேரன்மகாதேவி கைலாசநாதர் கோயில் | சந்திரன் | மேல்கைலாயம் |
| 3 | கோடகநல்லூர் | கோடகநல்லூர் கைலாசநாதர் கோயில் | செவ்வாய் | மேல்கைலாயம் |
| 4 | குன்னத்தூர் | குன்னத்தூர் கோத பரமேசுவரர் கோயில் | இராகு | நடுகைலாயம் |
| 5 | முறப்பநாடு | முறப்பநாடு கைலாசநாதர் கோயில் | குரு | நடுகைலாயம் |
| 6 | திருவைகுண்டம் | திருவைகுண்டம் கைலாசநாதர் கோயில் | சனி | நடுகைலாயம் |
| 7 | தென்திருப்பேரை | தென்திருப்பேரை கைலாசநாதர் கோயில் | புதன் | கீழ்கைலாயம் |
| 8 | ராஜபதி | இராஜபதி கைலாசநாதர் கோயில் | கேது | கீழ்கைலாயம் |
| 9 | சேர்ந்த பூமங்கலம் | சேர்ந்தபூமங்கலம் கைலாசநாதர் கோயில் | சுக்கிரன் | கீழ்கைலாயம் |
மேற்கோள்கள்
தொகு- ↑ "Karma". Archived from the original on 2013-03-26. பார்க்கப்பட்ட நாள் 2013-04-25.
- ↑ "நவகைலாய கோயில்களுக்கு சிறப்புப் பேருந்து: நெல்லை, தூத்துக்குடியில் முன்பதிவு".
உசாத்துணை
தொகு- தமிழ்நாடு அரசு இணையப்பக்கம் பரணிடப்பட்டது 2016-08-20 at the வந்தவழி இயந்திரம்
- பாபநாசம் கோவிலில் உள்ள அதன் மற்றும் பிற நவகைலாச கோவில்களின் தலவரலாறு
- 5-11-11 அன்றைய ஆனந்தவிகடன்
வெளி இணைப்புகள்
தொகு- நெல்லை , தூத்துகுடி மாவட்ட நவ கைலாயங்கள் பரணிடப்பட்டது 2013-10-05 at the வந்தவழி இயந்திரம்