அவிட்டம் (பஞ்சாங்கம்)

அவிட்டம் என்பது இந்திய வானியலிலும் சோதிடத்திலும் இராசிச் சக்கரத்தில் சொல்லப்படுகின்ற இருபத்தேழு நட்சத்திரக் கோணப் பிரிவுகளுள் 23 ஆவது பிரிவு ஆகும். இந்தியப் பஞ்சாங்க முறையில் சந்திரன் புவியைச் சுற்றி வரும்போது அவிட்ட நட்சத்திரக் கோணப் பிரிவுக்குள் இருக்கும் காலம் அவிட்ட நட்சத்திரத்துக்கு உரிய காலம் ஆகும். இந்திய சோதிடத்தின்படி, இந்தக் காலப் பகுதியில் பிறக்கும் ஒருவருடைய "பிறந்த நட்சத்திரம்" அல்லது "ஜன்ம நட்சத்திரம்" அவிட்டம் ஆகும்.

ஒவ்வொரு நட்சத்திரப் பிரிவும் 13° 20' அளவு கொண்டதாக இருப்பதால், இருபத்து மூன்றாவது நட்சத்திரமாகிய அவிட்டம் 293° 20'க்கும் 306° 40'க்கும் இடையில் அமைந்துள்ளது.[1] இந்தப் பிரிவு 3° 20' அளவு கொண்ட நான்கு சமமான பிரிவுகளாகப் பிரிக்கப்பட்டுள்ளது. இப்பிரிவுகள் அவிட்ட நட்சத்திரத்தின் முதலாம், இரண்டாம், மூன்றாம், நான்காம் பாதங்கள் எனப்படுகின்றன. இந்த நட்சத்திரத்தின் முதல் இரண்டு பாதங்களும் மகர இராசியிலும் ஏனைய இரண்டும் கும்ப இராசியிலும் அமைந்துள்ளன.

பெயரும் அடையாளக் குறியீடும்தொகு

 
டெல்பினசு விண்மீன் கூட்டம்

இந்திய வானியலிலும் சோதிடத்திலும் நட்சத்திரப் பிரிவுகளுக்குரிய பெயர்கள் அவ்வப் பிரிவுகளில் காணும் முக்கியமான விண்மீன்கள் (நட்சத்திரம்) அல்லது விண்மீன் கூட்டங்களைத் தழுவி இடப்பட்டவை. இதன்படி அவிட்ட நட்சத்திரப் பிரிவின் பெயர் அப்பிரிவுக்குள் காணப்படும் டெல்பினசு விண்மீன் கூட்டத்தில் காணப்படும் இரண்டு நட்சத்திரங்களைக் கொண்ட அவிட்டத்தின் (α முதல் δ டெல்பினி வரை) பெயரைத் தழுவியது. அவிட்டத்தின் சமசுக்கிருதப் பெயரான தனிஸ்தா (Dhanishtha) என்பது "ஆகக்கூடிய செல்வம் பொருந்தியது" என்னும் பொருள் கொண்டது. இதன் அடையாளக் குறியீடு "முரசு" ஆகும்.

சோதிடத்தில் அவிட்டம்தொகு

இயல்புகள்தொகு

இந்தியச் சோதிட நூல்கள் நட்சத்திரங்களோடு தொடர்புடையவையாகக் கருதப்படும் இயல்புகளைத் தேவதைகள், கோள்கள், விலங்குகள், பறவைகள், மரங்கள், இயற்கை மூலங்கள், சாதி, பால் போன்றவற்றின் மூலம் குறித்துக் காட்டுகின்றன. அவிட்ட நட்சத்திரத்துக்குரிய மேற்படி இயல்புகள் பின்வருமாறு:[2][3]

கோள் செவ்வாய்
தேவதை வசு
தன்மை அசையும்
சாதி பஞ்சம சாதி
கோத்திரம் புலகர்
பால் பெண்
குணம் இராட்சத குணம்
இயற்கை மூலம் ஆகாயம்
விலங்கு பெண் சிங்கம்
பறவை பொன்வண்டு
மரம் வன்னி
நாடி சுழுமுனை

குறிப்புக்கள்தொகு

  1. Raman, B. V., 1992. பக். 40.
  2. வெங்கடேச ஐயர், இ., 2012. பக். 24.
  3. Harness, Dennis M., Masco, Maire M., The Nakshatras of Vedic Astrology: Ancient & Contemporary Usage பரணிடப்பட்டது 2012-05-26 at the வந்தவழி இயந்திரம்.

உசாத்துணைகள்தொகு

இவற்றையும் பார்க்கவும்தொகு

வெளியிணைப்புக்கள்தொகு

"https://ta.wikipedia.org/w/index.php?title=அவிட்டம்_(பஞ்சாங்கம்)&oldid=3232545" இருந்து மீள்விக்கப்பட்டது