ஹப்பா கத்தூன்

ஹப்பா கத்தூன் ( Habba Khatoon ;1554-1609) சில சமயங்களில் கத்தூன் என்றும் உச்சரிக்கப்படுகிறது), "காஷ்மீரின் நைட்டிங்கேல்" என அறியப்பட்டவர். 16 ஆம் நூற்றாண்டின் காஷ்மீரி முஸ்லீம் கவிஞரும், துறவியுமான இவரது இசையமைப்புகள் பள்ளத்தாக்கில் தொடங்கப்பட்டதிலிருந்து எண்ணற்ற முறை பாடப்பட்டு வாசிக்கப்பட்டுள்ளன. மேலும் இவர் நிகரற்ற வாய்மொழி ஆற்றலுடன், எல்லா காலத்திலும் சிறந்த காஷ்மீரி கவிஞர்களில் ஒருவராகக் கருதப்படுகிறார்.

ஹப்பா கத்தூன்
காஷ்மீரின் நைட்டிங்கேல்
காஷ்மீர் அரசனின் ராணி
பதவி	1579 – 1586
பிறப்பு	Zoon 1554 (1554) சந்தாரா, பம்போர், காஷ்மீர் பள்ளத்தாக்கு
இறப்பு	1609 (அகவை 54–55) காஷ்மீர் பள்ளத்தாக்கு
புதைத்த இடம்	அத்வஜான், காஷ்மீர் பள்ளத்தாக்கு
துணைவர்	அசீஸ் ஜன் (முதல் கணவர்) யூசுப் ஷா சக்
மரபு	சக் வம்சம்
தந்தை	அப்தி ரதேர்
தாய்	ஜனம்
எழுத்துப் பணி
தொழில்	கவிஞர்
மொழி	காஷ்மீரி மொழி
கருப்பொருள்	இழப்பு மற்றும் பிரிவினை பற்றிய கவிதைகள் மற்றும் பாடல்கள்
செயற்பட்ட ஆண்டுகள்	அண். 1570 – 1609
குறிப்பிடத்தக்க படைப்புகள்	லோல்

சுயசரிதை

இவர், காஷ்மீரில் உள்ள புல்வாமா மாவட்டத்தில் பம்போரின் சந்தாரா என்ற ஒரு சிறிய கிராமத்தில் பிறந்தார். இவரது உண்மையான பெயர் ஜூன் என்பதாகும். வாய்வழி மரபின்படி, இவரது அழகு காரணமாக ஜூன் என்று அழைக்கப்பட்டார். ஒரு விவசாயக் குடும்பத்தைச் சேர்ந்தவர் என்றாலும், கிராமத்து மௌலவியிடம் எழுதவும் படிக்கவும் கற்றுக்கொண்டார்.

புராணத்தின் படி, ஒரு நாள் காஷ்மீரின் கடைசி சுதந்திரப் பேரரசரான யூசுப் ஷா சாக் குதிரையில் வேட்டையாடச் சென்றார். அவர் ஒரு சினார் மரத்தின் நிழலில் ஜூன் பாடுவதைக் கேட்டார். இந்த இணை சந்தித்து காதலித்தது. வாய்வழி பாரம்பரியம் ஜூனை யூசுப் ஷா சாக்கின் ராணி மனைவி என்று விவரிக்கிறது. இருப்பினும் இவர் உண்மையில் ஒரு குறைந்த அந்தஸ்து கொண்ட எஜமானி அல்லது அவரது அந்தப்புர உறுப்பினரா என்பது குறித்து அறிவார்ந்த விவாதம் உள்ளது. இவர் ஹப்பா கத்தூன் என்ற பெயருடன் 1570 இல் அரண்மனைக்குள் நுழைந்தார்.

யூசுப் ஷா காஷ்மீரின் ஆட்சியாளராக இருந்தபோது தம்பதியினர் மிகவும் மகிழ்ச்சியாக இருந்ததாக கூறப்படுகிறது. இருப்பினும், 1579 ஆம் ஆண்டில் முகலாய பேரரசர் அக்பர் யூசுப் ஷாவை கைது செய்து பீகாரில் சிறையில் அடைத்த பிறகு இவர்கள் பிரிந்தனர். இதற்குப் பிறகு, ஹப்பா கத்தூன் ஒரு சந்நியாசியாக மாறினார். மேலும் தனது வாழ்நாள் முழுவதையும் பள்ளத்தாக்கில் அலைந்து தன் பாடல்களைப் பாடிக்கொண்டிருந்தார்.

ஹப்பா காதுன் காஷ்மீரியில் பாடல்களை இயற்றினார். காஷ்மீரி கவிதைகளுக்கு "லோல்" என்பதை இவர் அறிமுகப்படுத்தியதாகக் கூறப்படுகிறது, "லோல்" என்பது ஆங்கிலப் 'பாடல்' வரிக்கு அதிகமாகவோ அல்லது குறைவாகவோ சமமானது. இது ஒரு சுருக்கமான சிந்தனையை வெளிப்படுத்துகிறது. ஹப்பா கத்தூனும், அர்னிமல் என்பவரும் "காஷ்மீரி கவிதையின் உண்மையான வடிவத்தை முழுமையாக்கினர்" என்று பிரஜ் கச்ரு கூறுகிறார்.

ஹப்பா கத்தூனின் வாழ்க்கை வரலாற்றின் துல்லியம் குறித்து சில சர்ச்சைகள் உள்ளன. இருப்பினும் இவருடன் தொடர்புடைய பாடல்கள் ( மீ ஹா கீர் திசே கித் மற்றும் ட்சே கமியு சோனி மீனி உட்பட ) காஷ்மீர் முழுவதும் பரவலாக பிரபலமாக உள்ளன. இவரது பாடல்கள் அடிக்கடி துக்கம் மற்றும் பிரிவின் துயரம் நிறைந்தவை. இவரது கல்லறை அத்வஜனுக்கு அருகில் உள்ளது .

கௌரவம்

காஷ்மீரின் குரேஸில் அமைந்துள்ள பிரமிடு வடிவ மலைக்கு இவரது பெயரிடப்பட்டது.

இலாகூரில் உள்ள முகல்புராவில் உள்ள ஒரு சுரங்கப்பாதைக்கு ஹப்பா கத்தூனின் பெயரிடப்பட்டது. இந்திய கடலோர காவல்படை ஒரு கப்பலுக்கு சிஜிஎஸ் ஹப்பா கத்தூன் என்று பெயர் சூட்டப்பட்டது.

ஹப்பா கத்தூன் (1978) என்ற காஷ்மீரி மொழி தொலைக்காட்சித் திரைப்படத்தை பஷீர் பட்காமி தூர்தர்ஷனுக்காக இயக்கியுள்ளார். இதில் ராணி வேடத்தில் ரீட்டா ரஸ்தான் நடித்தார். ஹப்பா கத்தூன் என்ற மற்றொரு இந்தி தொலைக்காட்சி நிகழ்ச்சி டிடி நேஷனலில் தூர்தர்ஷன் ஒளிபரப்பியது.

2000-2001 வரை டிடி நேஷனலில் ஒளிபரப்பான நூர்ஜஹான் இந்திய தொலைக்காட்சி தொடரில் மிருணாள் குல்கர்னி இவரது பாத்திரத்தை சித்தரித்தார்.

ஜூனி என்பது முசாபர் அலியின் வெளியிடப்படாத இந்தித் திரைப்படமாகும். இது 1990 இல் வெளியிடப்பட வேண்டும். ஆனால் இறுதியில் கிடப்பில் போடப்பட்டது. இந்தியத் திரைப்படத்தில் இவரது வாழ்க்கையை திரையில் சித்தரிப்பதற்கான தோல்வியுற்ற முயற்சிகள் 1960 களில் மெஹ்பூப் கான் மற்றும் 80 களில் பி. ஆர் சோப்ராவின் முயற்சிகளில் அடங்கும்.

இதனையும் பார்க்கவும்

• இலல்லேசுவரி

ஆதாரங்கள்

• Habba Khatoon (1554–1609), Biography
• Kashmiri poets: Habba Khatoon

Further reading

• Wakhlu, S. N. (1994). Habba Khatoon: the nightingale of Kashmir. South Asia Publications. பன்னாட்டுத் தரப்புத்தக எண் 8174330054.