முதன்மை பட்டியைத் திறக்கவும்

சிங்கப்பூரின் வரலாறு

இடது பக்க மேற்புறத்தில் தெமாசெக் தீவைக் காட்டும் நிலப்படம்.

எழுதப்பட்ட சிங்கப்பூரின் வரலாறு மூன்றாம் நூற்றாண்டிலிருந்து தொடங்குகின்றது. 14 ஆம் நூற்றாண்டில் குறிப்பிடத்தக்க வணிகக் குடியேற்றங்கள் சிங்கப்பூரில் இருந்ததற்கான சான்றுகள் உள்ளன. மசாபாகித் அல்லது சியாமியர்களால் வெளியேற்றப்படும்வரை இது பரமேசுவராவின் ஆட்சியின் கீழ் இருந்தது. இது பின்னர் மலாக்கா சுல்தானகத்துக்கும், அதன் பின்னர் சோகோர் சுல்தானகத்துக்கும் கீழ் வந்தது. 1819 இல், சர் தாமசு இசுட்டாம்போர்டு ராபிள்சு (Sir Thomas Stamford Raffles) சோகோருடன் ஒப்பந்தம் ஒன்றைச் செய்துகொண்டு அத்தீவில் பிரித்தானிய வணிகத் துறைமுகம் ஒன்றை நிறுவினார். இது 1824 இல் சிங்கப்பூர் பிரித்தானியக் குடியேற்ற நாடாக உருவாவதற்கு வழிசமைத்தது.

இரண்டாம் உலகப் போர்க் காலத்தில் சப்பானியப் பேரரசு சிங்கப்பூரைக் கைப்பற்றி 1942 இல் இருந்து 1945 வரை தமது கட்டுப்பாட்டில் வைத்திருந்தனர். போர் முடிந்த பின்னர் கூடிய அளவு தன்னாட்சியுடன், சிங்கப்பூர் மீண்டும் பிரித்தானியரின் கட்டுப்பாட்டுக்குள் வந்தது. 1963 இல் சிங்கப்பூர் மலாயக் கூட்டமைப்பில் இணைந்ததன் மூலம் மலேசியா உருவானது. எனினும், சிங்கப்பூரின் மக்கள் செயற்பாட்டுக் கட்சிக்கும், மலேசியாவின் கூட்டணிக் கட்சிக்கும் இடையே உருவான பிணக்குகளினாலும், உள்நாட்டுக் கலகங்களாலும், மலேசியக் கூட்டமைப்பில் இருந்து சிங்கப்பூர் வெளியேறியது. 1965 ஆகத்து 9 ஆம் தேதி சிங்கப்பூர் சுதந்திரக் குடியரசானது.

கடுமையான வேலையில்லாப் பிரச்சினையையும், வீட்டுவசதிப் பற்றாக்குறையையும் எதிர்கொண்ட சிங்கப்பூர் 1960கள் தொடக்கம் 1970கள் ஊடாக நவீனமயமாக்கத் திட்டம் ஒன்றை நடைமுறைப்படுத்தியது. இத்திட்டம், உற்பத்தித் தொழிற்றுறை ஒன்றை நிறுவுதல், பெரிய வீட்டுத் திட்டங்களை அமைத்தல், கல்வியில் பெருமளவு முதலிடுதல் என்பவற்றுக்கு முக்கியத்துவம் அளிக்கப்பட்டது.

1990கள் அளவில், சிங்கப்பூர், வளர்ச்சியடைந்த சுதந்திர சந்தைப் பொருளாதாரம், வலுவான பன்னாட்டு வணிகத் தொடர்புகள், சப்பான் தவிர்ந்த ஆசியாவின் மிகக்கூடிய "நபருக்கான உள்நாட்டு உற்பத்தி" ஆகியவற்றுடன், உலகின் மிகவும் வளம் பொருந்திய நாடுகளில் ஒன்றாக ஆனது.[1]

பண்டைய சிங்கப்பூர்தொகு

கிரேக்க-உரோம வானியலாளர் தொலமி, இரண்டாம் நூற்றாண்டில், இப்பகுதியில் சபானா என்னும் இடம் பற்றிக் குறிப்பிட்டுள்ளார்.[2] மூன்றாம் நூற்றாண்டைச் சேர்ந்த சீன மூலம் ஒன்றில் காணப்படும் பு லுவோ சுங் என்னும் தீவு பற்றிய விபரமே சிங்கப்பூரைப் பற்றிய மிக முந்திய எழுத்தாவணமாக இருக்கக்கூடும். இப்பெயர் மலாய் மொழிப் பெயரான "முனையில் உள்ள தீவு" (மலாய் தீவக்குறையின் முனையில்) என்னும் பொருள் தரும் பொலோ உஜோங் என்பதன் ஒலிமாற்றம் எனவே தெரிகிறது.[3] 1365 இல் சாவக மொழியில் எழுதப்பட்ட "நகரகிரேத்தாகாமா" என்னும் காவியப் பாடலில் துமாசிக் என்னும் தீவில் உள்ள குடியிருப்புப் பற்றிய குறிப்பு வருகிறது. துமாசிக் என்பது "கடல் நகரம்" அல்லது "கடல் துறை" என்னும் பொருளுடைய சொல்லாக இருக்கக்கூடும்.[4] தெமாசெக் என்னும் பெயர் "செஜாரா மெலேயு" இலும் காணப்படுகின்றது. இதில் உள்ள சிறீவிஜய இளவரசனின் கதைப்படி, சிறீ திரி புவன (சாங் நில உத்தமா எனவும் அறியப்படுகின்றது) 13 ஆம் நூற்றாண்டில் தெமாசெக்கில் இறங்கினார். அவர் அங்கே சிங்கம் என அறியப்பட்ட வித்தியாசமான விலங்கு ஒன்றைக் கண்டார். இளவரசர் அதை ஒரு நல்ல சகுனமாக் கருதி "சிங்கபுர" என்னும் பெயரில் ஒரு குடியிருப்பை உருவாக்கினார். ஆனாலும், அறிஞர்களின் கருத்துப்படி சிங்கபுர என்னும் பெயரின் தோற்றம் குறித்த சரியான காரணம் தெளிவாகத் தெரியவில்லை.[5]

மேற்கோள்கள்தொகு

  1. "World Economic Outlook Database, September, 2006". International Monetary Fund. மூல முகவரியிலிருந்து 7 May 2009 அன்று பரணிடப்பட்டது.
  2. Hack, Karl. "Records of Ancient Links between India and Singapore". National Institute of Education, Singapore. மூல முகவரியிலிருந்து 26 April 2006 அன்று பரணிடப்பட்டது. பார்த்த நாள் 2006-08-04.
  3. "Singapore: History, Singapore 1994". Asian Studies @ University of Texas at Austin. மூல முகவரியிலிருந்து 23 March 2007 அன்று பரணிடப்பட்டது. பார்த்த நாள் 7 July 2006.
  4. Victor R Savage, Brenda Yeoh (15 June 2013). Singapore Street Names: A Study of Toponymics. Marshall Cavendish. பக். 381. பன்னாட்டுத் தரப்புத்தக எண்:9789814484749. https://books.google.com/books?id=DTOJAAAAQBAJ&pg=PA381#v=onepage&q&f=false. 
  5. C.M. Turnbull (30 October 2009). A History of Modern Singapore, 1819-2005. NUS Press. பக். 21–22. பன்னாட்டுத் தரப்புத்தக எண்:978-9971694302. https://books.google.com/books?id=Y9yvBgAAQBAJ&pg=PA22#v=onepage&q&f=false. 
"https://ta.wikipedia.org/w/index.php?title=சிங்கப்பூரின்_வரலாறு&oldid=2531006" இருந்து மீள்விக்கப்பட்டது