சக்கரமில்லாத் தரையிறக்கம்

சக்கரமில்லாத் தரையிறக்கம் (Belly landing) அல்லது வேக மிகு தரையிறக்கம் என்பது ஒரு வானூர்தி தன் தரையிறங்கும் பல்சக்கரத்தினைப் பயன்படுத்தாமல் தரையிறக்கம் செய்வது ஆகும். வானூர்தியின் அடிப்பகுதி அல்லது உடற் பகுதியினை முதன்மை தரையிறக்கும் சாதனமாகப் பயன்படுத்தும் போது சக்கரமில்லாத் தரையிறக்கம் எனப்படும். இது ஆங்கிலத்தில் பெல்லி லேண்டிங் (belly landing) எனப்படும். பொதுவாக வேகமிகு பற்சக்கரத் தரையிறக்கம் என்ற சொல் வானூர்தி ஓட்டுநர் தரையிறங்கும் பற்சக்கரத்தினை தரையிறங்க வசதியாக நீட்டிக்க மறந்த சம்பவங்களைக் குறிக்கிறது. இதே நேரத்தில் சக்கரமில்லாத் தரையிறக்கம் என்பது இயந்திரச் செயலிழப்பு காரணமாக வானூர்தி ஓட்டுநர் தரை இறங்கும் பற்சக்கரத்தினைப் பயன்படுத்துவதைத் தடுத்து தரையிறங்கும் சம்பவங்களைக் குறிக்கும்.

போயிங் பி-17, டச்சசின் மகள், சக்கரமில்லாத் தரையிறக்க முறையில் தரையிறங்கிய பிறகு. (6 சூலை 1944)

சக்கரமில்லாத் தரையிறக்கத்தின் போது, பொதுவாக வானுர்திக்கு விரிவான சேதம் ஏற்படுகிறது. வானூர்தி மிக வேகமாகவோ அல்லது மிகவும் கடினமாகவோ தரையிறங்கினால், வானூர்தி புரட்டப்படலாம், சிதைந்து போகலாம் அல்லது தீப்பிடித்து எரியக்கூடும் என்ற அபாயத்தை இத்தகைய தரையிறங்கும் நிகழ்வு கொண்டுள்ளன. கட்டுப்பாட்டைப் பராமரிக்கப் போதுமான காற்றின் வேகத்தைப் பராமரிக்கும் அதே வேளையில் வானூர்தி முடிந்தவரை நேராகவும் சமமாகவும் தரையிறங்குவதை உறுதிப்படுத்தத் தீவிரத் துல்லியம் தேவைப்படுகிறது. வலுவான குறுக்கு காற்று, குறைந்த தெரிவுநிலை, வானூர்திக்குச் சேதம் அல்லது செயல்படாத கருவிகள் அல்லது கட்டுப்பாடுகள் இம்முறைத் தரையிறங்கும் அபாயத்தைப் பெரிதும் அதிகரிக்கின்றன. இருப்பினும், வானூர்தி விபத்துக்களில் மிகவும் பொதுவான வகைகளில் ஒன்று சக்கரமில்லாத் தரையிறக்கம் ஆகும், மேலும் இதனைக் கவனமாகச் செயல்படுத்தினால் பொதுவாக ஆபத்தில்லாமல் அமையும்.

காரணங்களும் தடுப்பு முறைகளும்

வானூர்தி ஓட்டுநரின் பிழை

ஆப்கானிஸ்தானின் பக்ராம் விமான நிலையத்தில் சக்கரமில்லாமல் தரையிறங்கிய பிறகு ஒரு போயிங்-17 குளோப்மாஸ்டர் (2009). இதற்கு காரணம் பின்னர் வானூர்தி ஓட்டுநரின் பிழை என்று தீர்மானிக்கப்பட்டது.

வேகமிகு பற்சக்கரத் தரையிறக்கத்திற்கு மிகவும் பொதுவான காரணம், தரையிறங்கும் முன் வானோடி தரையிறக்கும் பற்சக்கரத்தினை நீட்டிக்க மறப்பது ஆகும். திரும்பப் பெறக்கூடிய எந்தப் பற்சக்கர வானூர்தியிலும், தரையிறங்கும் பற்சக்கரத்தினை தாழ்படுத்துதல் வானோடியின் தரையிறங்குதல் சரிபார்ப்பு பட்டியலின் ஒரு பகுதியாகும். இதில் தொங்கற்பகுதி, உந்தி மற்றும் தரையிறக்கத்திற்கான பல்வேறு கருவிகளின் கட்டுப்பாடுகள் அடங்கும். தரையிறங்குவதற்கு முன்பு இதுபோன்ற சரிபார்ப்புகளைச் செய்யும் வானோடிகள் வேகமிகு பற்சக்கரத் தரையிறக்கத்தினை மேற்கொள்ளும் வாய்ப்பு குறைவு. இருப்பினும், சில வானோடிகள் இந்த சரிபார்ப்பு நிகழ்வுகளைப் புறக்கணித்து, நினைவகத்தின் மூலம் பணிகளைச் செய்கிறார்கள். இதனால் தரையிறங்கும் பற்சக்கரத்தினை நீட்டிக்க மறந்துவிடுவதற்கான வாய்ப்புகள் அதிகரிக்கின்றன. கவனமாக இருக்கும் வானோடிகள் கூட சில நேரத்தில் ஆபத்தில் சிக்கலாம். ஏனென்றால் அவர்களின் கவனம் திசைதிருப்பப்பட்டு, தரையிறங்குவதற்கான சரிபார்ப்பு பட்டியலை மேற்கொள்ள மறந்துவிடலாம் அல்லது மோதலைத் தவிர்ப்பது அல்லது மற்றொரு அவசரநிலை போன்ற பிற கடமைகளால் குறுக்கிடப்படலாம். மேலே காட்டப்பட்டுள்ள படத்தில், பி-17 டச்சசு இயல்பாகத் தரையிறங்கியபோது, உடன் வானோடியின் கவனக்குறைவாகத் தரையிறங்கும் பற்சக்கரப் பொத்தானைக் கவனக் குறைவாக இயக்கினார்.

திரும்பப் பெறக்கூடிய தரையிறங்கும் பற்சக்கரத்தினைக் கொண்ட அனைத்து வானூர்திகளும் தரையிறக்கும் பற்சக்கர நிலையைக் குறிக்க ஒரு வழியைக் கொண்டிருக்க வேண்டும். இது பொதுவாகப் பற்சக்கர நிலையினை மேலே, போக்குவரத்தில் அல்லது கீழே உள்ளதா என்பதைப் பொறுத்துச் சிவப்பு நிறத்திலிருந்து செம்பழுப்பு, பச்சை நிறமாக மாறும் விளக்குகளின் சமிக்கைகள் மூலம் தெரிந்து கொள்வர். இருப்பினும், கவனச்சிதறல் கொண்ட வானோடி இந்தச் சமிக்கையினைப் பார்க்க மறந்துவிடலாம். இத்தகைய மனிதப் பிழையின் சாத்தியக்கூறுகளைக் குறைக்க வானூர்தி வடிவமைப்பாளர்கள் வானூர்தியில் கூடுதல் பாதுகாப்பு அமைப்புகளை உருவாக்க வழிவகுத்தது. சிறிய விமானங்களில் இது பொதுவாக ஓர் எச்சரிக்கை ஒளி மற்றும் கொம்பு வடிவத்தைக் காண்பிக்கிறது. எந்தவொரு தரையிறங்கும் பற்சக்கரமும் பூட்டப்படாதபோது செயல்படுகிறது. வானோடிக்கு வானூர்தி பற்றி அறிமுகமில்லாதபோது, கொம்பு ஒலி எதைக் குறிக்கிறது என்று தெரியாத சூழ்நிலைகளில் இத்தகைய சமிக்கைப் பயனற்றது. வானோடிகள் சில நேரங்களில் தரையிறங்கும் பற்சக்கர எச்சரிக்கை கொம்பைத் தாமத எச்சரிக்கை கொம்புடன் குழப்பிக்கொள்கின்றனர். மற்ற சந்தர்ப்பங்களில், நவீனச் சத்தம்-இரத்துசெய்யும் காதொலிப்பான்களை அணிந்திருப்பதால் வானோடிகள் பழைய வானூர்தியில் எச்சரிக்கை சமிக்கையினைக் கேட்க முடியாது.

1951ஆம் ஆண்டில், லாக்ஹீட் எல்-749 கான்ஸ்டெல்லேஷன் மூலம் இயக்கப்படும் ஈஸ்டர்ன் விமானச்சேவையின் வானூர்தி 601, வர்ஜீனியாவில் உள்ள கர்ல்சு நெக் பார்மில் ஒரு புயலின் போது வெற்றிகரமாகப் பற்சக்கரமில்லா முறையில் தரையிறங்கியது.

பெரிய வானூர்திகளில், எச்சரிக்கை அமைப்பு வழக்கமாக எந்திரச் சக்தி அமைப்பை விலக்குகிறது. இதற்குப் பதிலாக தொங்கற்பகுதி தரையிறங்குவதற்குத் தயார் ஆனால் வானோடியை எச்சரிக்கிறது; ஆனால் தரையிறங்கும் பற்சக்கரம் செயலில் இல்லை. ஒரு மாற்று அமைப்பு தரையில் அருகாமையில் எச்சரிக்கை அமைப்பு அல்லது வானலையுணரி உயரமானியைப் பயன்படுத்தி வானூர்தி தரைக்கு நெருக்கமாக இருக்கும்போது பற்சக்கரம் கீழே இல்லாமல் இறங்கும்போது எச்சரிக்கையில் ஈடுபடுத்துகிறது. பெரும்பாலான வானூர்திகள் குரல் செய்தி அமைப்பை இணைத்துப் பயன்படுத்துகின்றன, இது ஒரு வாகன ஒலி அல்லது ஒலிப்பியின் தெளிவின்மையை நீக்குகிறது. இதற்குப் பதிலாக வானோடி ஒரு தெளிவான வாய்மொழி அறிகுறியை ("GEAR NOT DOWN") அளிப்பார். கூடுதலாக, பெரிய வானூர்திகள் ஒரு குழுவாகப் பணிபுரியும் இரண்டு வானோடிகளால் இயக்க வடிவமைக்கப்பட்டுள்ளன. ஒருவர் வானூர்தியினைப் பறக்கவிட்டு, தகவல் தொடர்பு மற்றும் மோதல் தவிர்ப்பு ஆகியவற்றைக் கையாளுவார். மற்றொருவர் வானூர்தி அமைப்புகளை இயக்குவார். இது ஒரு வகையான மனிதப் பணிச்சுமையினை நீக்குகிறது. மேலும் ஒரு குழு உறுப்பினர் மற்றவரின் வேலையைச் சரிபார்க்க முடியும். மேம்பட்ட எச்சரிக்கை அமைப்புகள் மற்றும் திறமையான குழு பயிற்சியானது பெரிய வானூர்திகளில் வேகமிகு பற்சக்கரம் தரையிறங்கும் விபத்துக்களைக் குறைக்கின்றது.

சில சந்தர்ப்பங்களில், வானூர்தியின் பறக்கும் பண்புகளால் பாதுகாப்பற்ற பற்சக்கர நிலை குறித்து வானோடிக்கு எச்சரிக்கை விடுக்கப்படலாம். பெரும்பாலும் மிகவும் நேர்த்தியான, உயர் செயல்திறன் கொண்ட வானூர்திகள் நீட்டிக்கப்பட்ட தரையிறங்கும் பற்சக்கர காற்றியக்க இழுவை இல்லாமல் பாதுகாப்பான தரையிறக்கம் வேகத்திற்கு மெதுவாகச் செல்வது மிகவும் கடினம்.

இயந்திர செயலிழப்பு

எட்வர்ட்சு விமானப்படை தளத்தில் பற்சக்கரமில்லா தரையிறங்கிய பின்னர் A-10 (2008)

இயந்திரச் செயலிழப்பு பற்சக்கரமில்லா தரையிறங்குவதற்கான மற்றொரு காரணமாகும். பெரும்பாலான தரையிறங்கும் பற்சக்கர மின்சார இயக்கிகள் அல்லது நீரியல் இயக்கிகளால் இயக்கப்படுகின்றன. முழுப் பற்சக்கர நீட்டிப்பு செயல்முறையும் தோல்வியடைவதைத் தடுக்கப் பல பணிநீக்கங்கள் பொதுவாக வழங்கப்படுகின்றன. மின்சார ரீதியாகவோ அல்லது நீரியல் முறையில் இயக்கப்பட்டாலும், தரையிறக்கப் பற்சக்கரம் பொதுவாகப் பல மூலங்களிலிருந்து இயக்கப்படலாம். மின் அமைப்பு தோல்வியுற்றால், அவசரக்கால நீட்டிப்பு அமைப்பு எப்போதும் பயன்பாட்டில் கிடைக்கும். இது கைமுறையாக இயக்கப்படும் சுழற்றி அல்லது எக்கியினைப் பயன்படுத்தலாம். இது மேல்நோக்கிப் பிரிக்கப்பட்டு, ஈர்ப்பு மற்றும்/அல்லது காற்றோட்டம் காரணமாக தரையிறங்கும் பற்சக்கரம் செயல்படவும் தடுக்கவும் அனுமதிக்கிறது.

தரையிறங்கும் போது ஏதேனும் ஒரு சக்கரக் கால் மட்டும் நீட்டிக்கத் தவறும் சந்தர்ப்பங்களில், வானோடி அனைத்து தரையிறங்கும் பற்சக்கரங்களையும் திரும்பப் பெற்று, சக்கரமில்லாத் தரையிறங்கும் முறையினைத் தேர்வு செய்யலாம். ஏனெனில் ஒரு பற்சக்கரம் இல்லாததை விடப் பற்சக்கரங்களே இல்லாமல் தரையிறக்கம் செய்யும் போது வானூர்தியினைக் கட்டுப்படுத்துவது எளிது என்று வானோடி நம்பலாம்.

ஏ-10 தண்டர்போல்ட் 2 போன்ற சில வானூர்திகள் பற்சக்கரமில்லா தரையிறங்குவதைப் பாதுகாப்பானதாக மாற்றுவதற்காகக் குறிப்பாக வடிவமைக்கப்பட்டுள்ளன. ஏ-10-இன் விடயத்தில், பின்வாங்கக்கூடிய பிரதானச் சக்கரங்கள் அவற்றின் பொறி அறையிலிருந்து வெளியே நீண்டுள்ளன, எனவே விமானம் கிட்டத்தட்ட பற்சக்கரமில்லா தரையிறக்கங்களுமாக உருண்டு செல்லும்.

ஆளில்லா பற்சக்கரமில்லாத் தரையிறக்கம்

கார்ன்பீல்ட் குண்டுவீச்சு வானூர்தி, அதன் தரையிறங்கும் இடத்திலிருந்து மீட்கப்படுவதற்கு முன்பு (1970)

வானூர்தி தங்கள் குழுவினரால் கைவிடப்பட்ட பின்னர் ஒப்பீட்டளவில் வெற்றிகரமான பற்சக்கரமில்லா தரையிறக்கத்தினை மேற்கொண்டதற்கான எடுத்துக்காட்டுகள் உள்ளன.

செருமன் ஜங்கர்சு ஜு 88 குண்டுவீச்சு விமானம், ஏப்ரல் 1942-இல் சோவியத் கப்பல் மீதான தாக்குதலுக்குப் பிறகு, இதன் வானோடி குழுவினரால் கைவிடப்பட்டு, நோர்வேயின் வடக்கே உள்ள பின்மார்க் உள்ள கார்ட்டெவாரில் ஒரு மலைப்பகுதியில் தரையிறங்கியது. இது 1988இல் மீட்கப்பட்டது. தற்போது இந்த வானூர்தி போடோ விமான நிலையத்தில் உள்ள நோர்ஸ்க் லுப்ட்பர்ட்சு அருங்காட்சியகத்தில் (நோர்வே வானூர்தி அருங்காட்சியகத்தில்) காட்சிக்கு வைக்கப்பட்டுள்ளது.

செப்டம்பர் 27,1956 அன்று ஒரு பெல் எக்சு-2 சோதனை வானூர்தி, மாக் 3.2இன் வான்வழி வேகச் சாதனையை நிறுவிய பின்னர், தொடர்ச்சியான கீழ்நோக்கி வீழ்தல் மற்றும் இயக்குபொறி இல்லாமலேயே சறுக்கிய பிறகு ஆளில்லா வானூர்தியினைப் பாலைவனத்தில் தரையிறக்கினர். இது மேலோட்டமாக மட்டுமே சேதமடைந்ததாகக் கருதப்பட்டது. ஆனால் தாக்கத்தின் போது மூன்று துண்டுகளாக உடைந்தது. வானோடியின் கட்டுப்பாட்டை இழந்த வானூர்தியிலிருந்து வானோடி தனது தப்பிக்கும் முறையைப் பயன்படுத்தி சுமார் 40,000 அடி (12,000 மீ) உயரத்திலிருந்து குதித்தார். ஆனால் வானோடியின் பொதி பாலைவனத்தில் மோதியதால் கொல்லப்பட்டார்.

நன்கு அறியப்பட்ட அமெரிக்க வான்படை கன்வேயர் எப்-106 டெல்டா டார்ட், வால் எண் 58-0787. 1970 பிப்ரவரியில், மொன்டானாவின் மீது ஒரு தட்டையான சுழற்சியில் நுழைந்தது. வானோடி வெளியேறியதைத் தொடர்ந்து, வானூர்தியின் சுழற்சி நிலைபெற்றது. மேலும் டெல்டா டார்ட் மொன்டானாவின் பிக் சாண்டிக்கு அருகிலுள்ள ஒரு வயலில் கீழே விழும் வரை பல மைல்கள் பறந்தது. வானூர்தி (பின்னர் கார்ன்பீல்ட் பாம்பெர் என்று செல்லப்பெயர் பெற்றது) பழுதுபார்க்கப்பட்டு சேவைக்குத் திரும்பியது. எப்-106 சேவையிலிருந்து திரும்பப் பெறப்பட்ட பின்னர், அமெரிக்க விமானப்படையின் தேசிய அருங்காட்சியகத்திற்கு வழங்கப்பட்டது.

நிகழ்வுகள்

• 1940 செப்டம்பர் 29 அன்று, 1940 ப்ரோக்லெசுபி நடு வானத்தில், இரண்டு அவ்ரோ அன்சன்சு மோதிய பின்னர் ஒன்றாக ஒரு வானூர்தியின் மீது மற்றொன்று இணைக்கப்பட்டது. இந்த மோதலில் மேல் வானூர்தியின் இயக்கிகள் இரண்டும் நொறுங்கின. ஆனால் கீழே உள்ள வானூர்தியின் இயந்திரங்கள் முழுச் சக்தியுடன் தொடர்ந்து செயல்பட்டன. கீழ் வானூர்தியின் வானோடி காயமடைந்தார். ஆனால் மேல் வானூர்தியின் வானோடி லியோனார்ட் கிரகாம் புல்லர், இறக்கைத் துடுப்பு மற்றும் தொங்கற்பகுதி மூலம் தனது கட்டுப்பாட்டில் வானூர்தியினைச் செயல்படுத்த முடிந்தது. ஆத்திரேலியாவின் நியூ சவுத் வேல்சில் உள்ள ப்ரோக்லெசுபிக்கு தென்மேற்கே 6 கிலோமீட்டர் தொலைவில் உள்ள ஒரு பெரிய புல்வெளியில் வெற்றிகரமாக இந்த வானூர்திகள் அவசரகாலப் பற்சக்கரமில்லா தரையிறங்கு முறையில் தரையிறக்கப்பட்டது. தரையிறங்குவதற்கு முன்னர் மோதலுக்குப் பிறகு 8 கிலோமீட்டர் (5 மைல்) தூரம் இந்த விமானம் பயணித்தது.

• சூலை 4,2000 அன்று, மாலேவ் வானூர்தி 262, துபோலேவ் து-154, தற்செயலாகத் தரையிறங்கும் போது பற்சக்கரம்-புவித் தொடல் காரணமாக ஓடுபாதையில் சறுக்கியது. ஆனால் ஒரு சுற்றுக்குப் பிறகு சாதாரணமாகத் தரையிறங்க முடிந்தது. காயங்கள் எதுவும் பதிவாகவில்லை.

• ஏப்ரல் 9,2006 அன்று, பபல்லோ ஏர்வேசு நிறுவனத்தால் துருக்கிய அரசாங்கத்திற்கு விற்கப்பட்ட கனடெய்ர் சி. எல்-215 நீர் குண்டுவீச்சு வானூர்தி இசுமிர் அட்னான் மெண்டெரெசு வானூர்தி நிலையத்தில் ஓடுபாதையில் தரையிறங்கியது. அப்போது துருக்கிய வானோடி தரையிறங்கும் பற்சக்கரத்தினைத் தாழ் நிலையில் வைக்கவில்லை. இதனால் ஏற்பட்ட விபத்தில் வானூர்தியின் மேலோடு சேதமடைந்தது; காயங்கள் எதுவும் ஏற்படவில்லை.

• 8 மே 2006 அன்று, அமெரிக்க விமானப்படை பி-1 லான்சர் மூலோபாயக் குண்டுவீச்சு விமானம் இந்தியப் பெருங்கடலில் உள்ள தியேகோ கார்சியா பவளப்பாறைகளில் தரையிறங்கியது. இதனால் தீ விபத்து ஏற்பட்டது. ஆனால் பணியாளர்களுக்கு இலேசான காயங்கள் மட்டுமே ஏற்பட்டதால், தீ முற்றிலும் அணைக்கப்பட்டது. வானோடிகள் எச்சரிக்கை முறையை அணைத்துவிட்டதாகவும், மேற்பார்வை குறித்து எச்சரிக்கக்கூடும் என்றும், தரையிறங்கும் நேரம் முழுவதும் கருவி பலகையில் சிவப்பு எச்சரிக்கை விளக்கைக் கவனிக்கவில்லை என்றும் கூறப்படுகிறது. கிட்டத்தட்ட 8 மில்லியன் டாலர் செலவில் பழுதுபார்ப்புகளுக்குப் பிறகு, ஒரு ஆண்டு கழித்து வானூர்தி சேவைக்கு மீண்டும் திரும்பியது.

• நவம்பர் 1,2011 அன்று, லாட் போலிஷ் ஏர்லைன்சு வானூர்தி 016, ஒரு போயிங் 767, வானூர்தி ததேயூசு உரோனா, நியூவர்க் லிபர்டி பன்னாட்டு வானூர்தி நிலையத்திலிருந்து வார்சா சோபின் வானூர்தி நிலையத்திற்குச் செல்லும் வழியில் தரையிறங்கும் பற்சக்கர இழப்பு ஏற்பட்டதால் அவசரநிலையை அறிவித்தார். இதில் சம்பந்தப்பட்ட வானூர்தி கடற்படையில் உள்ள புதிய 767 ஏர்ப்ரேம் ஆகும். இது வார்சாவில் சிறிய தீ விபத்துடன் பற்சக்கரமில்லா தரையிறக்கம் முறையில் தரையிறங்கியது. ஆனால் அனைத்துப் பயணிகளும் பணியாளர்களும் காயங்கள் இல்லாமல் வெளியேற்றப்பட்டனர். இதனால் வானூர்தி தரையிறங்கிய வானூர்தி நிலையம் ஒரு நாளுக்கும் மேலாக வானூர்தி நிலையம் மூடப்பட்டது.

• 22 மே 2020 அன்று, பாக்கித்தான் பன்னாட்டு ஏர்லைன்சு வானூர்தி 8303, ஏர்பஸ் ஏ320, வானோடியின் பிழை காரணமாகத் தரையிறங்கும் பற்சக்கரத்தினைப் பயன்படுத்தப்படாத நிலையில் சக்கரமில்லா முறையில் தரையிறங்கியது. இத்தரையிறக்கத்தின் போது இரண்டு இயந்திரங்களும் சேதமானது. கராச்சி அல்லாமா இக்பால் பன்னாட்டு வானூர்தி நிலையத்திற்கு அருகிலுள்ள மக்கள் அதிகமாக வசிக்கும் பகுதியில் வானூர்தி விபத்துக்குள்ளானது. இந்த விபத்தில் வானூர்தியிலிருந்த 99 பேரில் 97 பேரும், தரையில் இருந்த ஒருவரும் கொல்லப்பட்டனர்.

• 5 அக்டோபர் 2023 அன்று, பெடெக்சு விமானம் 1376, போயிங் 757, சட்டனூகா பெருநகர வானூர்தி நிலையத்திலிருந்து மெம்பிசு பன்னாட்டு வானூர்தி நிலையத்திற்குப் புறப்பட்டது. இதன் பற்சக்கரத்தினைத் தாழ் படுத்த முடியாததால் சக்கரமில்லா தரையிறங்க முறையினை மேற்கொள்ள வேண்டிய கட்டாயம் ஏற்பட்டது. வானூர்தி ஓடுபாதையிலிருந்து விலகிச் சென்றது. வானூர்தியிலிருந்த குழுவினருக்கு எந்தக் காயமும் ஏற்படவில்லை.

• அக்டோபர் 10, 2024 அன்று, தென்னிந்தியாவில் திருச்சிராப்பள்ளி பன்னாட்டு வானூர்தி நிலையத்திலிருந்து சார்ஜாவிற்கு புறப்பட்ட ஏர் இந்தியா எக்சுபிரசு வானூர்தி (போயிங் 737) புறப்பட்ட சிறிது நேரத்தில் தொழில்நுட்பக் கோளாறு காரணமாக இரண்டு மணி நேர வான் வட்டப் பயணத்திற்குப் பிறகு 141 பயணிகளுடன் பத்திரமாக தரையிறங்கியது. இந்திய நேரப்படி மாலை 05.45க்குப் புறப்பட்ட வானூர்தி IX-613, முதலில் சக்கரமில்லா தரையிறங்கலுக்கு அனுமதி வழங்கப்பட்டது. இருப்பினும், வானூர்தி எந்தப் பிரச்சனையும் இல்லாமல் சாதாரணமாகவும் பாதுகாப்பாகவும் இரவு 08.15 அளவில் தரையிறங்கியது.