சேரமான் பெருமாள் தொன்மக்கதைகள்

சேரமான் பெருமாள் என்ற பெயரில் வாழ்ந்த நாயனார் பற்றிக் கழறிற்றறிவார் நாயனார் கட்டுரையைப் பார்க்க.

சேரமான் பெருமாள் தொன்மக் கதைகள் (Legend of Cheraman Perumals) என்பன மர்மமாக மறைந்துபோன கேரளத்தை ஆண்ட சேரமான் பெருமாள் மரபின் கடைசி அரசனைப்பற்றி வழங்கி வரும் கதைகளாகும். இக்கதைகளுக்கான வரலாற்று ஆதாரங்கள் எதுவும் இல்லை.

மரபுவழிக் கதை

சேரமான் பெருமாள் யார் என்பதே விவாததுக்குள்ளானதாக உள்ளது. மகோதயபுரத்தை ஆண்ட பிற்காலச் சேர அரசர்களில் முதலாவது அல்லது கடைசி அரசனாக இருக்கக்கூடும் என்ற கருத்து நிலவுகிறது. தமிழ்நாடு மற்றும் கேரளப் பகுதிகளின் வரலாற்றில் பல்வேறு சேரமான் பெருமாள்கள் குறித்த குறிப்புகள் காணப்படுவதால் இச்சேரமான் பெருமாள் உண்மையில் யார் என்பதை அடையாளம் காண்பது கடினமாக உள்ளது. இவன் ஆண்ட காலம் 12 ஆண்டுகள் (சில கதைகளில் 20 ஆண்டுகள்) என நம்பப்படுகிறது.

மக்களிடையே தாங்கள் உயர்ந்தவர்கள் என்பதை நிலைநாட்டும்வகையில், கேரள நம்பூதிரிகளால் சேரமான் பெருமாள் மரபுவழிக்கதைகள் உண்டாக்கப்பட்டதாகவும் நம்பப்படுகிறது. பிராமண மரபுவழிக் கதைகள் ஒன்றில், உள்ளூர் கிராமக் குழுவினர் திறமையாக செயல்படாமையால், ஆட்சி செய்வதற்காக கேரளத்துக்கு வெளியிலிருந்து அழைத்து வரப்பட்டவர்கள் சேர மரபினர் என்று கூறப்படுகிறது. மேலும் இந்த அரசர்கள் சேரமான் என்று அழைக்கப்பட்டனர்; அவர்களை உயர்ந்தவர்கள் என்று காட்டுவதற்காக, அவர்கள் பெயருடன் பெருமாள் (கடவுள்) என்ற பட்டமும் சேர்க்கப்பட்டது என்பது இக்கதையின் கூற்று. மேலும் சேரமான் பெருமாள் அரசர்கள் பன்னிருவர் என்றும் கூறுகிறது. ஆனால் கேரளோல்பத்தியின்படி, இவ்வரசர்களின் எண்ணிக்கை 20 ஆகும்.

கேரளத்தில் புத்தம் அதிகம் பரவியிருந்ததால், பெருமாள் என்பது புத்தர் என்பதன் ஒத்த பெயராக இருந்திருக்கவேண்டும் எனவும் ஒரு கருத்து நிலவுகிறது. பன்னிரு ஆழ்வார்களில் ஒருவரும் அரச துறவியுமான குலசேகர ஆழ்வாரின் பெயரிலிருந்து பெருமாள் என்ற பட்டப்பெயர் பெறப்பட்டிருக்கலாம் என்ற கருத்தும் உள்ளது. இராமரின் சிறந்த பக்தராக இருந்தவர் குலசேகர ஆழ்வார். இவருக்கு பெருமாள் என்ற பட்டப்பெயர் உண்டு. மேலும் இவரது இன்றைய சீடர்களும் இதே பட்டப்பெயரை பயன்படுத்துகின்றனர். மார்த்தாண்ட வர்மர் என்ற பெயருடன் "பத்மநாபதாசர்" என்ற பெயரையும் கொண்ட திருவிதாங்கூர் அரசர்களும் குலசேகராழ்வாரின் சீடர்களாவர்.

சேரமான் பெருமாளின் மர்ம மறைவு

தனது ஆட்சியின் இறுதிகாலத்தில் சேரமான் பெருமாள் கடைசியாக எங்கு சென்று மறைந்தான் என்பது குறித்து பல்வேறு கருத்துகள் உள்ளன:

• மெக்கா (தாஜுதீன் சேரமான் பெருமாள் என்ற கதைப்படி)
• கயிலை மலை (சேரமான் பெருமாள் நயினார் என்ற மரபுக்கதைப்படி)
• கபிலவஸ்து, லும்பினி, சாரநாத் போன்ற ஏதேனொமொரு புத்த தலங்கள்
• கேரள புத்தமதத்தினர் தலைமைப் பொறுப்பு வகித்திருந்த நாளந்தா பல்கலைக்கழகம்

ஆனால் இவற்றுக்கான சரியான ஆதாரங்கள் எதுவும் இல்லாததால் அவர் சென்று மறைந்த இடம் எதுவென்பது புதிராகவே உள்ளது

சேரமான் பெருமாளை பல்வேறு ஆட்களாக அடையாளப்படுத்தும் கதைகளும் உள்ளன:

• கேரளத்தின் அரச பரம்பரையைத் தோற்றுவித்தவன் மற்றும் ஒரு சத்திரிய குலப்பெண் மற்றும் மூன்று சூத்திர குலப் பெண்களின் கணவன்.
• ஈழவர்களின் பாதுக்காப்பின்கீழ் தச்சர்களைத் திருப்பிக் கொண்டுவருமாறு ஈழத்துக்குச் செய்தியனுப்பிய அரசன்.
• கிபி 628 இல் மெக்காவிற்குச் சென்று இசுலாமிய சமயத்தில் இணைந்து அப்துல் ரஹ்மான் சமிரி எனப் பெயர் மாற்றியவர்.
• இசுலாமிய வட்டங்களில் நிலவும் கதைப்படி, நிலவின் பிளப்பைக் கண்டவர்; முகம்மது நபியால் தியாஜுதீன் என்ற பெயரில் இசுலாமியத்திற்கு மாற்றப்பட்டவர்.
• நாயர் தலைவருக்கு வாளைப் பரிசளித்து அவரை கோழிக்கோட்டின் சாமூத்திரி ஆக்கியவர்.
• இரு சிரியன் கிறித்துவ வணிகர்களுக்கு (Mar Sabor, Mar Proth) வணிகம் செய்ய உரிமையை வழங்கியவர்.
• ஆயிக்கார எஜமானனுக்கு அவன் அதிகாரத்தை ஆதரிக்கும்வகையில் தனது தலைப்பாகையைத் தந்தவர்.
• சைவத் துறவியாகி, சுந்தரருடன் சேர்ந்து தென்னிந்திய சிவத்தலங்களுக்குப் பயணம் சென்று, பின்னர் சிவனின் தொண்டராகக் கயிலைமலையை அடைந்தவர்.
• புத்தசமயத்தைத் தழுவியவர்.

திரைப்படத்தில்

சேரமான் பெருமாள் அல்லது தாஜிதீன் வாழ்க்கையை மையப்படுத்தி, சேரமான் கதாபாத்திரத்தில் நடிகர் மம்மூட்டி நடிக்கும் மலையாளத் திரைப்படம், இந்தியா மற்றும் ஓமான் கூட்டுத்தயாரிப்பாகத் தயாரிக்கப்படவுள்ளது.

தாஜுதீன் சேரமான் பெருமாளின் கதை

சேரமான் ஜும்ஆ மசூதியின் கூற்றுப்படி, "ஒருமுறை, சேரமான் பெருமாள் என்ற தமிழ் மாமன்னன் , ஒருவேளை பாசுகர ரவி வர்மா என்று அழைக்கப்படுபவன், அவனது விருப்பமான ராணிகளில் ஒருவருடன் அவர் வாழ்ந்த அரண்மனை தோட்டத்தில் இரவு உலா வந்து கொண்டிருந்தான். இந்த உலாவின் போது தான் சந்திரன் பிளவுபடுவதைக் கண்டார். இருப்பினும், அரண்மனையிலோ அல்லது இந்திய துணைக்கண்டத்தின் பிற பகுதிகளிலோ இந்த குறிப்பிடத்தக்க நிகழ்வை வேறு யாரும் பார்க்கவில்லை. முஸ்லீம்கள் மதீனாவுக்கு குடிபெயர்வதற்கு பல ஆண்டுகளுக்கு முன்பு நிகழ்ந்த முழு நிலவின் பிளவால் அதிர்ச்சியடைந்த சேரமான், சேர சாம்ராஜ்யத்தின் தலைநகருக்கு விரைந்தார். இந்த சந்திர நிகழ்வின் சரியான நேரத்தைத் தீர்மானிக்க சித்தர்கள் எனப்படும் இந்து வானியலாளர்களின் சங்கிலியைக் கலந்தாலோசிக்க அவர் விரும்பினார். இந்துக் கணித முறைப்படி, வானியலாளர்கள் சந்திர கிரகணத்தைக் கணிக்க முடிந்திருக்க வேண்டும். ஆயினும்கூட, இந்த நிகழ்வின் துல்லியமான வானியல் தேதி மற்றும் நேரம் நிச்சயமற்றதாகவே உள்ளது. எனவே, தெரியாத காரணங்களுக்காக பனூ குறைஷி பழங்குடியினத்தைச் சேர்ந்த சில அரபு வணிகர்கள் சேரமானின் அரண்மனைக்குச் சென்றபோது, கிழக்கு வானத்தில் நடந்திருக்க வேண்டிய இந்த சம்பவம் குறித்து விசாரிக்க அவர் வாய்ப்பைப் பெற்றார். இந்து வானியலாளர்கள் இந்த வானியல் நிகழ்வின் சரியான நேரத்தையும் ஒருங்கிணைப்புகளையும் கணக்கிட முடிந்திருக்க வேண்டும். அவர்களின் வேண்டுகோளின் பேரில், மன்னர் அரேபிய நிலவு-கடவுள் ஹுபலின் கோவிலிலும், மக்காவில் உள்ள குரைஷ் சிலைகளின் ஆலயத்திலும் பிரார்த்தனை செய்ய ஒரு யாத்திரையைத் தொடங்கினார். காபாவிற்குச் சென்ற போது, சேரமான் இஸ்லாமிய தீர்க்கதரிசி முஹம்மதுவைச் சந்திக்கும் வாய்ப்பைப் பெற்றார் மற்றும் அல்லாஹ்வின் தூதர் மற்றும் அவரது தோழர்களுக்கு இஞ்சி ஊறுகாயை பரிசாக வழங்கினார். அவர் முஹம்மதுவுடன் அரபு மொழியில் உரையாடினார், இந்த சந்திப்பின் போது முஹம்மதுவின் தோழரான பிலால், சேரமானை இஸ்லாத்திற்கு மாற்ற வழிகாட்டினார். இதன் விளைவாக, முஹம்மது அவருக்கு தாஜுதீன், தாஜுதீன் அல்லது தியா-அஜ்-அத்தான் என்ற பெயரை வழங்கினார், அதாவது "நம்பிக்கையின் கிரீடம்" என்று பொருள்படும், இதன் மூலம் முதல் இந்திய முஸ்லீம் ஆனார் [1] 9 ஆம் நூற்றாண்டின் அல்-தபரி தனது ஃபிர்தௌசுல் ஹிக்மாவில் மற்றும் ஃபெரிஷ்தா தனது தாரிக் ஃபெரிஷ்தாவில் இதை ஒப்புக்கொள்கிறார்.

எஸ்.என்.சதாசிவன், எ சோஷியல் ஹிஸ்டரி ஆஃப் இந்தியா என்ற புத்தகத்தில், மாலத்தீவின் ராஜா கலிமாஞ்சா தான் இஸ்லாத்திற்கு மாறினார் என்று வாதிடுகிறார். அப்போது கடலோடிகளுக்குத் தெரிந்த மாலி, மலபார் (கேரளா) என்று தவறாகப் புரிந்து கொள்ளப்பட்டிருக்கலாம், இது கொச்சி கெசட்டியரில் தாஜுதீன் கதையை உருவாக்கி இருக்கலாம்.