யாம் துவான் பெசார்
யாம் துவான் பெசார் அல்லது யாங் டி பெர்துவான் பெசார் (ஆங்கிலம்: Yamtuan Besar; Yang di-Pertuan Besar (Grand Ruler); மலாய்: Yang di-Pertuan Besar of Negeri Sembilan) என்பது மலேசியா; நெகிரி செம்பிலான் மாநிலத்தின் ஆட்சியாளரின் அரச பட்டமாகும். அந்த மாநிலத்தின் ஆளும் தலைவர்கள் அல்லது உண்டாங் (Undang) எனும் குழுவினரால் தேர்ந்தெடுக்கப் படுகிறார்.[1]
| யாம் துவான் பெசார் Yamtuan Besar | |
|---|---|
| Duli Yang Maha Mulia | |
 மாட்சிமிகு துவாங்கு முகிரிஸ் | |
| முடிசூட்டுதல் | 26 அக்டோபர் 2009 |
| முன்னையவர் | இராஜா மெலேவார் |
இந்த அரச நடைமுறை 1773-ஆண்டில் இருந்து பின்பற்றப்படுகிறது. யாம் துவான் பெசார், நெகிரி செம்பிலானின் நான்கு முன்னணி இளவரசர்களில் (Putera Yang Empat) இருந்து தேர்ந்தெடுக்கப் படுகிறார்.
வரலாறு
தொகுஇந்தோனேசியாவில் இருந்து 18-ஆம் நூற்றாண்டுகளில் இந்தோனேசிய மினாங்கபாவு இனத்தவர்கள் மலேசியாவிற்குப் புலம் பெயர்ந்தனர். அவர்கள் நெகிரி செம்பிலானில் புதுக் குடியேற்றங்களை உருவாக்கினார்கள். அடுத்து புது மன்னராட்சியையும் தோற்றுவித்தார்கள்.[2]
இவர்களின் மன்னராட்சி முறை மற்ற மாநிலங்களைக் காட்டிலும் சற்று மாறு பட்டு இருக்கிறது. ஒரு மன்னரின் மகன் வாரிசாக அமையாமல் ஒரு மாவட்டத்தின் தலைவர் மன்னராகப் பிரகடனம் செய்யப் படுவதே இந்த மாநிலத்தில் காணப்படும் சிறப்புத் தன்மை ஆகும்.
ஆட்சியாளர் தேர்வு முறை
தொகுநெகிரி செம்பிலானில் அதன் யாங் டி பெர்துவான் பெசார் எனும் ஆட்சியாளர் தேர்ந்தெடுக்கப் படும் முறை மற்ற மாநிலங்களைக் காட்டிலும் மாறுபட்டு உள்ளது. நெகிரி செம்பிலான் மாநிலத்தின் மாவட்டத் தலைவர்கள் ஆட்சியாளரைத் தேர்வு செய்கின்றனர். மாவட்டத் தலைவர்களை உண்டாங் என்று அழைக்கின்றனர்.[3]
நெகிரி செம்பிலான் மாநிலத்தில் உள்ள நான்கு உண்டாங்குகளுக்கு மட்டுமே ஆட்சியாளரைத் தேர்வு செய்யும் உரிமை உண்டு. அந்த நான்கு உண்டாங்குகள்:
- சுங்கை ஊஜோங் உண்டாங்
- ஜெலுபு உண்டாங்
- ஜொகூல் உண்டாங்
- ரெம்பாவ் உண்டாங்
ஆட்சியாளர்த் தேர்வில் உண்டாங்குகள் வாக்கு அளிக்கலாம். ஆனால், அவர்கள் ஆட்சியாளர் தேர்தலில் வேட்பாளராக நிற்க முடியாது.
நெகிரி செம்பிலானின் ஆட்சியாளர் தேர்தலில் நிற்க வேண்டுமானால், அவர் ஒரு மலாய்க்கார ஆணாக இருக்க வேண்டும். இராஜா ராடின் இப்னி இராஜா லெங்காங் பாரம்பரியத்தில் பிறந்தவராக இருக்க வேண்டும்.
யாங் டி பெர்துவான் பெசார்
தொகுநெகிரி செம்பிலான் மாநிலம் நான்கு மாவட்டப் பிரிவுகளாகப் பிரிக்கப் பட்டுள்ளது. சுங்கை ஊஜோங், ஜெலுபு, சொகூல், ரெம்பாவ் என நான்கு பிரிவுகள். இந்த ஒவ்வொரு மாவட்டத்திற்கும் ஒரு தலைவர் இருக்கின்றார்.
அந்தத் தலைவரை உண்டாங் என்று அழைக்கிறார்கள். மாநிலத்தின் மன்னர் பதவி காலியாகும் போது சுங்கை ஊஜோங், ஜெலுபு, சொகூல், ரெம்பாவ் மாவட்டங்களின் தலைவர்கள் ஒன்று கூடி அவர்களின் நம்பிக்கைக்கு உரிய ஒருவரை நெகிரி செம்பிலான் மாநிலத்தின் மன்னராகத் தெரிவு செய்கின்றனர்.
அவ்வாறு தெரிவு செய்யப் படும் மன்னர், சுல்தான் என அழைக்கப் படுவது இல்லை. அதற்குப் பதிலாக யாங் டி பெர்துவான் பெசார் (Yang di-Pertuan Besar) என்று அழைக்கப் படுகின்றார்.
பூகிஸ் படையெடுப்பு
தொகு15-ஆம் நூற்றாண்டில் மினாங்கபாவ் இனத்தவர் சுமத்திராவில் இருந்து மலேசியாவில் குடியேறினர். அவர்களுக்கு மலாக்கா சுல்தான்கள் பாதுகாப்பு வழங்கினர். மலாக்கா சுல்தான்களுக்கு பின்னர் ஜொகூர் சுல்தான்கள் உதவி வழங்கினர்.
அந்தக் காலக்கட்டத்தில் சுமத்திராவில் இருந்து வந்த பூகிஸ் எனும் மற்றோர் இனத்தவர் ஜொகூரின் மீது தொடர்ந்து தாக்குதல் நடத்தினர். அதனால் ஜொகூர் ஆட்சி பலகீனம் அடைந்தது.
ஆகவே, நெகிரி செம்பிலானில் வாழ்ந்து வந்த மினாங்கபாவ் மக்கள் தங்களின் சொந்த சுமத்திரா சுல்தானின் உதவியைக் கோரினர். அப்போது சுமத்திராவில் மினாங்கபாவ்களுக்கு சுல்தான் அப்துல் ஜாலில் என்பவர் சுல்தானாக இருந்தார்.[4]
ராஜா மெலாவார்
தொகுநெகிரி செம்பிலான் மினாங்கபாவு மக்களுக்கு உதவி செய்ய இராஜா மெலேவார் என்பவர் சுமத்திராவில் இருந்து அனுப்பப் பட்டார். ஆனால், இராஜா மெலேவார் நெகிரி செம்பிலானுக்கு வந்த போது இராஜா காத்திப் (Raja Khatib) என்பவர் தன்னைத் தானே மன்னராகப் பிரகடனம் செய்து கொண்டு ஆட்சியில் இருந்தார்.
சினம் அடைந்த இராஜா மெலேவார், இராஜா காத்திப் மீது போர் பிரகடனம் செய்தார். போர் நடந்தது. அதில் இராஜா மெலேவார் வெற்றி பெற்றார். உடனே ஜொகூர் சுல்தான் புதிய ஆட்சியாளரான இராஜா மெலேவாரை அங்கீகரித்து புதிய யாங் டி பெர்துவான் பெசாராக அறிவித்தார். யாங் டி பெர்துவான் பெசார் என்றால் எல்லா மாநிலங்களுக்கும் தலைவர் என்று பொருள். இது 1773-இல் நடந்த நிகழ்ச்சி.
இராஜா மெலேவார் இறந்ததும் அரியணைப் போட்டி தீவிரமானது. தடி எடுத்தவன் எல்லாம் தண்டல்காரன் ஆனது போல ஆளாளுக்குத் தங்களைத் தலைவர்களாகப் பிரகடனம் செய்து கொண்டனர். அதனால், நெகிரி செம்பிலானில் குழப்பம் ஏற்பட்டது. இந்தக் கட்டத்தில் பிரித்தானியர்கள் நெகிரி செம்பிலான் ஆட்சியில் தலையிட்டனர்.
பிரித்தானிய ஆளுமை
தொகுநெகிரி செம்பிலான் மாநிலத்தில் பிரித்தானியர்களின் முதலீடுகளைப் பாதுகாக்கப் பிரித்தானியர்களுக்குச் சகல உரிமைகளும் உள்ளன எனும் காரணங்களைக் கூறி சுங்கை ஊஜோங் உள்நாட்டுக் கலகத்தில் தலையிட்டனர். அதன்படி 1873-இல் சுங்கை ஊஜோங் மாவட்டம் பிரித்தானியர்களின் பாதுகாப்பின் கீழ் வந்தது.
சுங்கை ஊஜோங் மாவட்டத்திற்கு பிரித்தானிய கண்காணிப்பாளர் (British Resident) நியமிக்கப் பட்டார். 1886-இல் ஜெலுபு மாவட்டம் பிரித்தானியர்களின் ஆளுமையின் கீழ் வந்தது. இதர சொகூல், ரெம்பாவ் மாவட்டங்கள் 1897-இல் பிரித்தானியர்களின் கைகளுக்கு மாறின.
நெகிரி செம்பிலான் மாநிலத்தை ஜப்பானியர்கள் 1941-இல் இருந்து 1945 வரை ஆட்சி செய்தனர். 1948-இல் நெகிரி செம்பிலான் மாநிலம், மலாயா கூட்டமைப்பு மாநிலங்களின் அமைப்பில் இணைந்தது. பின்னர் 1963-இல், மலேசியாவின் ஒரு மாநிலமாக உறுப்பியம் பெற்றது.[5]
மேற்கோள்கள்
தொகு- ↑ Radin, Tunku Halim (2018). Prince called "Charlie", a. Malaysia: M Parallax. pp. 13–22. பன்னாட்டுத் தரப்புத்தக எண் 9789671651506.
- ↑ Birch, E.W. (1906). Election and Installation of Tungku Muhammad, C.M.G. Bin Tungku Antah, as the Yang Di Per Tuan Bĕsár, Negri Sembilan, the (JRASSB v.46 ed.). Malaya: Royal Asiatic Society - Straits Branch. pp. 9–22.
- ↑ https://museumvolunteersjmm.com/2016/04/04/the-minangkabau-of-negeri-sembilan/
- ↑ "காப்பகப்படுத்தப்பட்ட நகல்". Archived from the original on 2018-07-28. பார்க்கப்பட்ட நாள் 2021-11-27.
- ↑ "Colonial Reports--annual, Issues 1570-1599". 1931. பார்க்கப்பட்ட நாள் 9 January 2021.